សាំងឡើងថ្លៃ! វៀតណាម ជំរុញដល់ក្រុមហ៊ុននានា គួរអនុញ្ញាតឲ្យបុគ្គលិកធ្វើការពីផ្ទះ

ស្របពេលប្រេងសាំងឡើងថ្លៃជាសកល ប្រទេសជាច្រើននៅលើពិភពលោក កំពុងជួបវិបត្តិនិងរិះរកគ្រប់វិធីដើម្បីដោះស្រាយ ខណៈប្រទេសវៀតណាម បានជំរុញដល់ក្រុមហ៊ុននានា គួរអនុញ្ញាតឲ្យបុគ្គលិកធ្វើការពីផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ VN Express កាលពីថ្ងៃចន្ទទី៩ខែមីនាឆ្នាំ២០២៦ ក្រសួងឧស្សាហកម្មនិងពាណិជ្ជកម្មវៀតណាម លើកទឹកចិត្តឲ្យបណ្តាក្រុមហ៊ុន-សហគ្រាស អនុញ្ញាតឲ្យបុគ្គលិកធ្វើការពីផ្ទះ និងអំពាវនាវឲ្យពលរដ្ឋសន្សំសំចៃប្រេងសាំង។

ក្រសួងបានចេញសេចក្តីណែនាំថា ក្រុមហ៊ុន-សហគ្រាសទាំងឡាយ គួរតែវាយតម្លៃនិងអនុគ្រោះដល់បុគ្គលិករូបណា ដែលអាចធ្វើការពីផ្ទះបាន គួរតែឲ្យពួកគេធ្វើការពីផ្ទះដើម្បីជួយសម្រួលនិងកាត់បន្ថយថ្លៃចំណាយ ព្រោះតែតម្លៃប្រេងសាំងកំពុងហក់ឡើងខ្ពស់ទៅៗ ដោយសារសង្គ្រាមមជ្ឈិមបូព៌ា មិនទាន់ធូរស្រាល។

ទន្ទឹមនោះ ក្រសួងក៏អំពាវនាវដល់ប្រជាពលរដ្ឋនិងអាជីវកម្មនានា កុំទាន់ភ័យស្លន់ស្លោឬស្តុកទុកប្រេងសាំង និងប្រេងម៉ាស៊ូតឲ្យសោះ។ ក្រសួងការប្រាប់ពលរដ្ឋឲ្យរាយការណ៍ជាបន្ទាន់ផងដែរ បើស្ថានីយប្រេងសាំងណារកស៊ីល្មើសច្បាប់ ដូចជាការផ្អាកលក់ដោយគ្មានមូលហេតុ ការលក់ក្នុងតម្លៃខុសពីតម្លៃដែលបានបិទផ្សាយឬការលាក់ទុកប្រេងឥន្ធនៈ។

អាជ្ញាធរក៏ជំរុញផងដែរឲ្យប្រជាពលរដ្ឋ កាត់បន្ថយការប្រើប្រាស់យានយន្តផ្ទាល់ខ្លួន ដោយផ្តល់អាទិភាពដល់ការធ្វើដំណើររួមគ្នា ឬការប្រើប្រាស់មធ្យោបាយដឹកជញ្ជូនសាធារណៈ។

សូមជម្រាបជាថ្មី នៅពេលបើកការជួញដូរលើទីផ្សារអាស៊ីកាលពីព្រឹកថ្ងៃចន្ទ, តម្លៃប្រេងអន្តរជាតិ​បាន​ហក់ឡើងកប់ពពកជិត ៣០% ដល់ជិត ១២០ ដុល្លារ/បារ៉ែល ដោយសារតែផលប៉ះពាល់ផ្នែកផ្គត់ផ្គង់ បណ្ដាលមក​ពី​ភាពតានតឹងនៃជម្លោះរវាងអ៊ីស្រាអែល/សហរដ្ឋអាមេរិក និងអ៊ីរ៉ង់។

តម្លៃប្រេងឆៅនាពេលអនាគត ម៉ាក Brent បាន​កើនឡើង ២៥.៩១ ដុល្លារ/បារ៉ែល ឬ ២៧,៩៥% ដល់ ១១៨.៦ ដុល្លារ/បារ៉ែល គិតត្រឹមម៉ោង ១០​ កន្លះ​ ព្រឹក​ នៅទីក្រុងហុងកុង។ ដោយឡែកតម្លៃប្រេងអាមេរិក ម៉ាក WTI វិញ បាន​កើនឡើង ២៧.២៦ ដុល្លារ​ ឬ ២៩,៩៩% ដល់ប្រមាណ ១១៨,៧ ដុល្លារ/បារ៉ែល៕

អត្ថបទ៖ សុខ សុវណ្ណ