កិច្ច​ចរចាសន្តិភាពអ៊ុយក្រែនត្រូវផ្អាក ដោយសារឥទ្ធិពលសង្គ្រាមនៅអ៊ីរ៉ង់

កិច្ចពិភាក្សាត្រីភាគីដើម្បីស្វែងរកសន្តិភាពរវាងសហរដ្ឋអាមេរិក រុស្ស៊ី និងអ៊ុយក្រែន ត្រូវបានប្រកាសផ្អាកជាផ្លូវការហើយ នា​ថ្ងៃព្រហស្បតិ៍​ទី​១៩​ខែ​មីនា​ឆ្នាំ​២០២៦​នេះ។

យោងតាមរបាយការណ៍ពីសារព័ត៌មាន Izvestia ដែល​ត្រូវ​បាន​ចុះ​ផ្សាយ​ដោយ​រ៉យទ័រ វិមានក្រឹមឡាំងបានបញ្ជាក់ថា ការផ្អាកនេះគឺបណ្ដាលមកពីសង្គ្រាមដែលកំពុងឆាបឆេះយ៉ាងខ្លាំងនៅក្នុងប្រទេសអ៊ីរ៉ង់ ដែលបានធ្វើ​ឲ្យ​យុទ្ធសាស្ត្រនយោបាយពិភពលោកមានការប្រែប្រួល។

មន្ត្រីរុស្ស៊ីយល់ឃើញថា នៅពេលដែលអាមេរិកងាកទៅផ្ដោតខ្លាំងលើសមរភូមិមជ្ឈិមបូព៌ា វានឹងធ្វើ​ឲ្យ​អំណាចចរចារបស់អ៊ុយក្រែនចុះខ្សោយ។ ស្ថានភាពនេះអាចនឹងរុញច្រាន​ឲ្យ​ទីក្រុងកៀវ​គ្មានជម្រើសក្រៅពីការធ្វើសម្បទាន ឬយល់ព្រមតាមលក្ខខណ្ឌមួយចំនួនរបស់រុស្ស៊ី ដើម្បីបញ្ចប់សង្គ្រាមដែលបានអូសបន្លាយអស់រយៈពេល៤ឆ្នាំមកនេះ។

លោក Dmitry Peskov អ្នកនាំពាក្យវិមានក្រឹមឡាំង បាន​លើក​ឡើង​ថា ខណៈដែលកិច្ចសហប្រតិបត្តិការផ្នែកវិនិយោគ និងសេដ្ឋកិច្ចនៅតែបន្តធ្វើឡើងដោយតំណាងរុស្ស៊ីលោក Kirill Dmitriev ប៉ុន្តែរាល់កិច្ចពិភាក្សានយោបាយកម្រិតខ្ពស់នៃក្រុមត្រីភាគី ត្រូវបានដាក់ឲ្យស្ថិតក្នុងស្ថានភាព «រង់ចាំ» សិន។ នេះគឺជាសញ្ញាមួយបង្ហាញថា កិច្ចប្រឹងប្រែងផ្នែកការទូតដើម្បីបញ្ចប់សង្គ្រាមនៅអ៊ុយក្រែន កំពុងតែជួបឧបសគ្គធំ និងស្ថិតក្នុងភាពមិនច្បាស់លាស់នៅឡើយ ដរាបណាវិបត្តិនៅអ៊ីរ៉ង់មិនទាន់បានធូរស្រាល៕

ប្រែសម្រួល៖ ឈាង