មន្ទីរបញ្ចកោណ៖ អាមេរិកចំណាយអស់ ២៥ពាន់លានដុល្លារហើយ ក្នុងសង្គ្រាមនៅអ៊ីរ៉ង់

សង្គ្រាមនៅប្រទេសអ៊ីរ៉ង់ ដែលបានចាប់ផ្ដើមឡើងតាំងពីចុងខែកុម្ភៈកន្លងទៅ បានធ្វើឲ្យ​ក្រសួងការពារជាតិអាមេរិក ចំណាយប្រាក់អស់យ៉ាងសន្ធឹកសន្ធាប់។ មន្ត្រីជាន់ខ្ពស់ម្នាក់នៃមន្ទីរបញ្ចកោណ បានបង្ហើប​ឲ្យ​ដឹងកាលពីថ្ងៃពុធថា រហូតមកដល់ពេលនេះ អាមេរិកបានចំណាយអស់ប្រាក់ប្រមាណ ២៥ពាន់លានដុល្លារទៅហើយ នៅក្នុងប្រតិបត្តិការយោធាដែលមានឈ្មោះថា «Epic Fury»។

ចុះផ្សាយ​ថ្ងៃ​ព្រហស្បតិ៍​ ទី​៣០ ខែមេសា ឆ្នាំ​២០២៦ ទីភ្នាក់ងារ​ព័ត៌មាន AFP បាន​ឲ្យ​ដឹង​ថា លោក Jules Hurst ដែលជាអ្នកត្រួតពិនិត្យហិរញ្ញវត្ថុស្ដីទីរបស់មន្ទីរបញ្ចកោណ បានពន្យល់ប្រាប់សមាជិកសភាថា កញ្ចប់ថវិកាដ៏ច្រើនសន្ធឹកសន្ធាប់ភាគច្រើនបំផុត គឺត្រូវបានប្រើប្រាស់ទៅលើគ្រាប់រំសេវ និងគ្រឿងយុទ្ធភណ្ឌផ្សេងៗ ដែលប្រើក្នុងសមរភូមិ។

យ៉ាង​ណាមិញ នៅក្នុងសវនាការសភានោះដែរ រដ្ឋមន្ត្រីការពារជាតិអាមេរិក លោក Pete Hegseth បានលើកឡើងថា តួលេខដែលបានប៉ាន់ស្មាននោះ អាចនឹងមានកម្រិតទាបជាង ២៥ពាន់លានដុល្លារបន្តិចបន្តួច។ នៅពេលដែលសមាជិកសភាដេញដោលសួរអំពីការចំណាយដ៏ច្រើនលើសលប់ក្នុងសង្គ្រាមនេះ លោក Hegseth បានវាយបកដោយសំណួរថា អ្វីដែលសំខាន់បំផុតនោះគឺ តើវាមានតម្លៃកម្រិតណាទៅ ដើម្បីធានាឲ្យ​បានថា ប្រទេសអ៊ីរ៉ង់ នឹងមិនអាចមានឱកាសទទួលបានអាវុធនុយក្លេអ៊ែរ យកមកប្រើប្រាស់បាន។

គួរបញ្ជាក់ផងដែរថា សហរដ្ឋអាមេរិក និងអ៊ីស្រាអែល បានបើកយុទ្ធនាការវាយប្រហារតាមអាកាស​ទ្រង់ទ្រាយធំ ប្រឆាំងនឹងកងទ័ព និងថ្នាក់ដឹកនាំរបស់អ៊ីរ៉ង់ កាលពីថ្ងៃទី២៨ ខែកុម្ភៈ។ បើទោះបីជាបច្ចុប្បន្ន ប្រធានាធិបតី ដូណាល់ ត្រាំ បានសម្រេចពន្យារពេលបទឈប់បាញ់ ដែលធ្លាប់បានកំណត់ត្រឹមរយៈពេលពីរសប្ដាហ៍ដំបូងឲ្យមានរយៈពេលយូរមិនកំណត់ ដើម្បីផ្អាកការប្រយុទ្ធគ្នាក៏ដោយ ក៏ប៉ុន្តែជម្លោះដ៏រ៉ាំរ៉ៃនេះ រួមទាំងផលប៉ះពាល់សេដ្ឋកិច្ចយ៉ាងធ្ងន់ធ្ងរនៅជុំវិញពិភពលោក នៅមិនទាន់មានដំណោះស្រាយច្បាស់លាស់ណាមួយនៅឡើយទេ៕

ប្រែសម្រួល៖ ឈាង