លោក ត្រាំ ប្រកាសថា ចិន ព្រមទិញយន្តហោះ ២០០គ្រឿង ពីក្រុមហ៊ុន Boeing

ប្រធានាធិបតី ដូណាល់ ត្រាំ បានប្រាប់ក្រុមអ្នកយកព័ត៌មាននៅលើយន្តហោះ  Air Force One កាលពីថ្ងៃសុក្រ ទី១៥ ខែឧសភា ថា ក្រុមហ៊ុនផលិតយន្តហោះ Boeing នឹងសម្រេចបាននូវការលក់ដ៏ធំលើកដំបូងបង្អស់របស់ខ្លួនទៅឲ្យប្រទេសចិន ក្នុងរយៈពេលជិតមួយទសវត្សរ៍នេះ ជាមួយនឹងការបញ្ជាទិញយន្តហោះចំនួន ២០០ គ្រឿង។

លោកបានបន្តថា កិច្ចព្រមព្រៀងនេះត្រូវបានធ្វើឡើងនៅក្នុងកិច្ចប្រជុំកំពូលរបស់លោក ជាមួយប្រធានាធិបតីចិន ស៊ី ជីនពីង នាសប្តាហ៍នេះ ហើយទំហំនៃការបញ្ជាទិញនេះអាចនឹងកើនឡើងរហូតដល់ទៅ ៧៥០ គ្រឿងឯណោះ។ នេះបើយោងតាមការចុះផ្សាយពីសារព័ត៌មាន PBS ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ក៏បានបន្ថែមទៀតថា កិច្ចព្រមព្រៀងនឹងផ្តល់ផលប្រយោជន៍ដល់ក្រុមហ៊ុន General Electric ផងដែរ ដោយលោកបានបញ្ជាក់ថា ក្រុមហ៊ុននេះនឹងផ្គត់ផ្គង់ម៉ាស៊ីនយន្តហោះពី ចំនួន ៤០០ ទៅ ៤៥០ គ្រឿង។

ទោះជាយ៉ាងណាក៏ដោយ ខាងសេតវិមានមិនទាន់បានបញ្ចេញព័ត៌មានលម្អិត អំពីកិច្ចព្រមព្រៀងនេះនៅឡើយទេ ហើយក្រុមហ៊ុន Boeing ផ្ទាល់ក៏មិនទាន់បានចេញមុខបកស្រាយអ្វីដែរ។ ជាក់ស្ដែង លោក Kelly Ortberg នាយកប្រតិបត្តិរបស់ក្រុមហ៊ុន Boeing បានរួមដំណើរជាមួយលោក ត្រាំ ក្នុងដំណើរទស្សនកិច្ចទៅកាន់ទីក្រុងប៉េកាំងនេះ ក្នុងចំណោមក្រុមនាយកប្រតិបត្តិក្រុមហ៊ុនធំៗជាច្រើនរូបទៀត ដែលស្វែងរកឱកាសលក់ផលិតផល និងសេវាកម្មទៅឲ្យប្រទេសចិន។ សម្រាប់ក្រុមហ៊ុន Boeing កិច្ចព្រមព្រៀងនេះនឹងក្លាយជារបកគំហើញដ៏សំខាន់មួយនៅក្នុងទីផ្សារចិន ដែលធ្លាប់ជាចំណុចកណ្តាលនៃការរីកចម្រើនរយៈពេលវែងរបស់ខ្លួន។

ដោយឡែក កាលពីខែមុន លោក Ortberg បានបង្ហាញក្តីទុកចិត្តថា រាល់កិច្ចព្រមព្រៀងទូលំទូលាយរវាងអាមេរិក និងចិន នឹងរួមបញ្ចូលទាំងការទិញយន្តហោះផងដែរ ដោយលោកបានប្រាប់វិនិយោគិនថា លោកបានរំពឹងទុកថាកិច្ចប្រជុំរបស់លោក ត្រាំ ជាមួយលោក ស៊ី នឹងក្លាយជា «ឱកាសដ៏មានន័យ» សម្រាប់ក្រុមហ៊ុន Boeing៕

អត្ថបទ៖ សាង ស្រីល័ក្ខ

លីបង់ ប្រកាសឈប់ធ្វើឈ្នាន់សង្គ្រាមបរទេស និងសម្លឹងរកជំនួយអន្តរជាតិ ត្រៀមចរចាជាមួយ អ៊ីស្រាអែល