ចិន ធ្វើតេស្តមនុស្សជាង៣លាននាក់បន្ទាប់ពីមានការឆ្លងកូវីដក្នុងសហគមន៍

ប្រទេសចិនកំពុងចាប់ផ្តើមធ្វើតេស្តទ្រង់ទ្រាយធំលើមនុស្ស៣លាននាក់នៅក្នុងតំបន់មួយនៃទីក្រុងភាគខាងជើង Tianjin ហើយបានធ្វើតេស្តមនុស្សចំនួន៤,០១៥នាក់ផ្សេងទៀតនៅក្នុងមន្ទីរពេទ្យមួយនៃទីក្រុង Shanghai បន្ទាប់ពីបានរកឃើញករណីឆ្លងកូវីដនៅទីនោះ។

គណៈកម្មការសុខភាពជាតិបានកត់ត្រាករណីឆ្លងក្នុងសហគមន៍ចំនួន៧ករណីនៅថ្ងៃសៅរ៍ទី២១ខែវិច្ឆិកានេះដោយក្នុងនោះមាន៥ករណីនៅទីក្រុង Tianjin និង២ករណីនៅទីក្រុង Shanghai។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រ ទីក្រុង Tianjin បានរាយការណ៍អំពីការឆ្លងក្នុងសហគមន៍ដែលពាក់ព័ន្ធនឹងបុគ្គលបួននាក់ផ្សេងគ្នា។ ជាការឆ្លើយតប អាជ្ញាធរមូលដ្ឋានបានបិទសហគមន៍ដែលជាកន្លែងប្រជាជនរស់នៅក៏ដូចជាមន្ទីរពេទ្យនិងសាលាមត្តេយ្យផងដែរ។

យោងតាមទំព័រប្រព័ន្ធផ្សព្វផ្សាយសង្គមរបស់រដ្ឋាភិបាលក្នុងតំបន់បានឲ្យដឹងថា នៅថ្ងៃសៅរ៍នេះ អាជ្ញាធរបានចាប់ផ្តើមធ្វើតេស្តប្រជាជនទាំងអស់នៅក្នុងសង្កាត់ Binhai នៃទីក្រុង Tianjin។

ស្របពេលជាមួយគ្នានោះ អាជ្ញាធរក្នុងទីក្រុង Shanghai បានបិទមន្ទីរពេទ្យមួយបន្ទាប់ពីប្តីនិងប្រពន្ធមួយគូធ្វើតេស្តវិជ្ជមានជំងឺកូវីដ១៩កាលពីយប់ថ្ងៃសុក្របន្ទាប់ពីបានទៅមន្ទីរពេទ្យនោះ។

គួរបញ្ជាក់ថា គិតត្រឹមពេលនេះ ករណីវីរុសកូរ៉ូណាដែលត្រូវបានបញ្ជាក់សរុបរបស់ប្រទេសចិនមានចំនួន៨៦,៤១៤ករណី៕

ប្រែសម្រួលដោយ៖ Vann Vann

ប្រភព៖ AP