ព័ត៌មានអន្ដរជាតិ

ប្រជាជនខ្លាចខ្វះនាំគ្នាទិញអ៊ុកស៊ីសែនទុកផ្ទះ ធ្វើឲ្យក្រសួងសុខាភិបាលវៀតណាមព្រមាន

បានផុស

១ year មុន

នៅ

ថ្ងៃអង្គារ ២០ កក្កដា ២០២១

ដោយ

ក្រសួងសុខាភិបាលវៀតណាមបានព្រមានប្រជាជនមិនគួររក្សាទុកឧបករណ៍ជំនួយដង្ហើម និងអ៊ុកស៊ីសែននៅតាមផ្ទះឡើយ ប្រសិនបើពួកគេមិនត្រូវការប្រើប្រាស់នោះ ពីព្រោះវាអាចធ្វើឲ្យមានការខ្វះខាត។

លោក Nguyen Trong Khoa អនុប្រធានរដ្ឋបាលពិនិត្យ និងព្យាបាលវេជ្ជសាស្ត្ររបស់ក្រសួងសុខាភិបាលបាននិយាយថា ៖«ក្រសួងសុខាភិបាល និងទីក្រុងហូជីមិញសូមធានាដល់អ្នកជំងឺថា មិនខ្វះឧបករណ៍ជំនួយដង្ហើម និងអ៊ុកស៊ីសែនឡើយ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ក្រសួងបានរកឃើញការផលិតអ៊ុកស៊ីសែនអាចផ្គត់ផ្គង់បានដល់ទៅ៣០ដងសម្រាប់តម្រូវការប្រើប្រាស់នៅមន្ទីរពេទ្យសព្វថ្ងៃនេះ។

នៅពេលចំនួនឆ្លងកូវីដ-១៩កំពុងកើនឡើងខ្ពស់ជាលំដាប់បានធ្វើឲ្យប្រជាជនមានការព្រួយបារម្ភ ដូច្នេះអ្នកខ្លះបានទិញឧបករណ៍ជំនួយដង្ហើម និងអ៊ុកស៊ីសែនដោយខ្លួនឯងត្រៀមទុកនៅផ្ទះ។ ប៉ុន្តែលោក Khoa បាននិយាយថា មិនមែនអ្នកជំងឺឆ្លងកូវីដ-១៩ទាំងអស់សុទ្ធតែត្រូវការឧបករណ៍ជំនួយដង្ហើម និងអ៊ុកស៊ីសែនឡើយ លើកលែងតែអ្នកដែលមានបញ្ហាផ្លូវដង្ហើម និងពិបាកដកដង្ហើមខ្លាំងប៉ុណ្ណោះ។

លោក Khoa បានឲ្យដឹងថា ប្រតិបត្តិការឧករណ៍ជំនួយដង្ហើមនៅតាមផ្ទះតម្រូវឲ្យមាននីតិវិធីច្បាស់លាស់ជាងឧបករណ៍ផ្សេងៗដូចជាទែម៉ូម៉ែត្រជាដើម។ ឧករណ៍នេះគួរតែត្រូវប្រតិបត្តិនៅតាមមន្ទីរពេទ្យដែលមានបំពាក់ឧបករណ៍ត្រឹមត្រូវ។ ការប្រើប្រាស់ឧបករណ៍ជំនួយដង្ហើមទាំងនោះក៏ត្រូវការតាមដានដោយបុគ្គលិកពេទ្យដែលមានសមត្ថភាព ប្រសិនបើមានបញ្ហាអ្វីកើតឡើង។

លោក Khoa មានប្រសាសន៍ថា ៖«ដោយការតម្លើងជាលក្ខណៈគ្រួសារ ឧបករណ៍ជំនួយដង្ហើមមិនអាចត្រូវបានដំណើរការបានទេ ហើយបុគ្គលិកពេទ្យក៏មិនបានបញ្ជូនទៅជួយរៀបចំតាមផ្ទះដែរ»។ លោកបន្ថែមថា ការរក្សាទុកឧបករណ៍ជំនួយដង្ហើមនៅតាមផ្ទះមិនត្រឹមតែគ្មានប្រយោជន៍ប៉ុណ្ណោះទេ ប៉ុន្តែអាចបណ្តាលឲ្យមានការខ្វះខាតថែមទៀត។

លោកបន្ថែមថា ក្នុងចំណោមអ្នកឆ្លងកូវីដ-១៩ទាំងអស់នៅប្រទេសវៀតមានប្រមាណ៨០%មិនមានរោគសញ្ញាធ្វើទុក្ខ ឬស្រាល ហើយមានប្រហែល៦%ប៉ុណ្ណោះដែលត្រូវការឧបករណ៍ជំនួយដង្ហើម។

រហូតដល់ពេលនេះ ប្រទេសវៀតណាមមានករណីឆ្លងកូវីដ-១៩សរុប ៥២ ១៦៤នាក់ចាប់តាំងពីរលកទី៤បានផ្ទះឡើងកាលពីចុងខែមេសា៕

ប្រែសម្រួល៖ វីរបុត្រ
ប្រភព៖ vnexpress