អាមេរិក និយាយថា លោក Ghani លែងជាឥស្សរជននៅអាហ្វហ្គានីស្ថានទៀតហើយ ក្រោយចេញមុខសន្យានឹងវិលត្រឡប់ទៅវិញ

កាលពីថ្ងៃពុធ សហរដ្ឋអាមេរិកហាក់ដូចជាបដិសេធការសន្យារបស់អតីតប្រធានាធិបតីលោក Ashraf Ghani ថានឹងវិលត្រឡប់ទៅប្រទេសដែលគាត់បានភៀសខ្លួន ចំពេលដែលក្រុមតាលីបង់រឹបអូសទីក្រុងកាប៊ុល ដោយនិយាយថា គាត់លែងជាឥស្សរជននៅអាហ្វហ្គានីស្ថានទៀតហើយ ។

អនុរដ្ឋមន្រ្តីក្រសួងការបរទេសលោកស្រី Wendy Sherman បានប្រាប់អ្នកយកព័ត៌មានថា លោកស្រីបានឃើញរបាយការណ៍ដែលថា លោក Ghani បានមកដល់ប្រទេសអារ៉ាប់ រួមជាមួយ​ក្រុម​គ្រួសារ​របស់​លោក​ក្នុង​មូលដ្ឋាន​មនុស្ស​ធម៌ ។

ថ្លែងនៅក្នុងសារវីដេអូមួយ ដែលត្រូវបានចេញផ្សាយពីអារ៉ាប់រួមកាលពីព្រឹកថ្ងៃពុធ លោក Ghani បានប្តេជ្ញាថានឹងវិលត្រឡប់ទៅអាហ្វហ្គានីស្ថានវិញ ដើម្បីបន្តការតស៊ូរបស់គាត់ដើម្បីសិទ្ធិ និងតម្លៃប្រជាជន បន្ទាប់ពីបានរត់គេចខ្លួនកាលពីថ្ងៃអាទិត្យ ។

លោក Ghani បាននិយាយថា “ខ្ញុំមានមោទនភាពចំពោះកងកម្លាំងសន្តិសុខរបស់យើង ពួកគេមិនត្រូវចាញ់ឡើយ យើងបានបរាជ័យលើផ្នែកនយោបាយ ។ វាគឺជាការបរាជ័យនៃការដឹកនាំរបស់រដ្ឋាភិបាល មេដឹកនាំតាលីបង់ និងសហគមន៍អន្តរជាតិ ។ វាគឺជាការបរាជ័យនៃដំណើរការសន្តិភាព ។

លោកបានអះអាងថា “ខ្ញុំចង់ផ្ទេរអំណាចទៅឲ្យតាលីបង់ដោយសន្តិវិធី ។ ប៉ុន្តែខ្ញុំត្រូវបានបណ្តេញចេញពីអាហ្វហ្គានីស្ថានប្រឆាំងនឹងឆន្ទៈរបស់ខ្ញុំ” ។

ពាក់ព័ន្ធនឹងបញ្ហានេះ លោកស្រី Sherman បាននិយាយថា ខណៈពេលដែលការសន្យានេះត្រូវបានគាំទ្រយ៉ាងធំធេងចំពោះជនជាតិអាមេរិក ប៉ុន្តែក្រុមដែលមានគំនិតរឹងរូសហាក់ដូចជាបានរំលោភលើការសន្យារបស់ខ្លួន ជាមួយជនជាតិអាហ្វហ្គានីស្ថាន ។

លោកស្រីបាននិយាយថា “យើងបានឃើញរបាយការណ៍ដែលថា ក្រុមតាលីបង់គឺផ្ទុយពីសេចក្តីថ្លែងការណ៍ជាសាធារណៈ និងការប្តេជ្ញាចិត្តរបស់ពួកគេចំពោះរដ្ឋាភិបាលរបស់យើង កំពុងរារាំងជនជាតិអាហ្វហ្គានីស្ថានដែលចង់ចាកចេញពីប្រទេស មិនឲ្យទៅដល់ព្រលានយន្តហោះ” ។

លោកស្រីបន្ថែមថា “ក្រុមរបស់យើងនៅទីក្រុងដូហា ប្រទេសកាតា និងដៃគូយោធារបស់យើងនៅមូលដ្ឋាននៅទីក្រុងកាប៊ុល កំពុងចូលរួមដោយផ្ទាល់ជាមួយតាលីបង់ ដើម្បីបញ្ជាក់ឲ្យច្បាស់ថា ពួកគេនឹងអនុញ្ញាតឲ្យពលរដ្ឋអាមេរិក ជនជាតិប្រទេសទីបី និងជនជាតិអាហ្វហ្គានីស្ថានទាំងអស់ដែលមានបំណងចាកចេញដោយសុវត្ថិភាព និងគ្មានការយាយី” ។

គួរបញ្ជាក់ថា សង្រ្គាមរវាងកងកម្លាំងតាលីបង់ និងអាហ្វហ្គានីស្ថានកាន់តែខ្លាំងឡើង នៅពេលដែលកងទ័ពបរទេសបានប្រកាសដកខ្លួនចេញពីប្រទេសត្រឹមថ្ងៃទី ១១ ខែកញ្ញា ដែលជាខួប ២០ ឆ្នាំនៃការវាយប្រហារភេរវកម្មដែលនាំឲ្យអាមេរិកឈ្លានពានប្រទេសនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លេខ​មុខ​នៅ​អារ៉ាប់​រួម​ លោក Ghani​ ថា​ នឹង​វិល​ទៅ​អាហ្វហ្គានីស្ថាន​វិញ