ព័ត៌មានអន្ដរជាតិ

លោក គីម សរសើរទំនាក់ទំនងជាមួយ ចិន ចូលក្នុងសម័យកាលរុងរឿងថ្មី

បានផុស

២ years មុន

នៅ

ថ្ងៃព្រហស្បតិ៍ ២៣ ធ្នូ ២០២១

ដោយ

មេដឹកនាំកូរ៉េខាងជើង លោក គីម ជុងអ៊ុន បានសរសើរឯកអគ្គរដ្ឋទូតចិនដែលត្រូវចាកចេញ លោក Li Jinjun សម្រាប់ការជួយធ្វើឲ្យទំនាក់ទំនងល្អប្រសើរឡើងរវាងទីក្រុងព្យុងយ៉ាង និងទីក្រុងប៉េកាំង។ នេះបើតាមប្រព័ន្ធផ្សព្វផ្សាយរដ្ឋបានចេញផ្សាយនៅថ្ងៃព្រហស្បតិ៍នេះ បន្ទាប់ពីឯកអគ្គរដ្ឋទូតចិនរូបនេះបានចាកចេញពីតំណែងរយៈពេល៧ឆ្នាំ។

ទីភ្នាក់ងារសារព័ត៌មានរដ្ឋ KCNA បានផ្សាយថា ការអត្ថាធិប្បាយរបស់លោក គីម ត្រូវបានបញ្ជូនទៅលោក Li ដោយលោក Choe Ryong Hae មន្ត្រីរបស់គណបក្សពលករកូរ៉េដែលកំពុងកាន់អំណាច។ លោក Li ក៏បានជាជួបលោកនាយករដ្ឋមន្ត្រីកូរ៉េខាងជើង Kim Tok Hun។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Choe បានប្រាប់លោក Li ថា ៖«លោក គីម ជុងអ៊ុន បានកោតសរសើរខ្ពស់ពីឯកអគ្គរដ្ឋទូតសម្រាប់ការជួយប្រកបដោយជោគជ័យនូវកិច្ចប្រជុំកំពូលរវាងកូរ៉េខាងជើង និងចិន ក្នុងរយៈពេល៧ឆ្នាំកន្លងទៅនេះ បានធ្វើកិច្ចខិតខំប្រឹងយ៉ាងច្រើនដើម្បីអភិវឌ្ឍទំនាក់ទំនងប្រកបដោយភាពរីករាយរវាងភាគីទាំងពីរ និងប្រទេសទាំងពីរ ព្រមទាំងចែករំលែកសុខទុក្ខជាមួយពលរដ្ឋកូរ៉េខាងជើង»។

លោកបានបន្តថា លោក គីម ពិតជារីករាយខ្លាំងដែលសម្ព័ន្ធភាពកូរ៉េ-ចិនបានចូលទៅក្នុងសម័យកាលរុងរឿងថ្មីស្ថិតក្រោមភាពដឹកនាំរបស់គណបក្សកាន់អំណាចរបស់ប្រទេសទាំងពីរ។

លោក Li បានប្រាប់ទៅលោក Choe វិញឲ្យនាំការថ្លែងអំណរគុណទៅលោក គីម និងចូលរួមអបរសាទរពលរដ្ឋកូរ៉េខាងជើងជុំវិញវឌ្ឍនភាពលើគ្រប់វិស័យ។

ប្រទេសចិនជាសម្ព័ន្ធមិត្តធំបំផុតតែមួយគត់របស់ប្រទេសកូរ៉េខាងជើងចាប់តាំងពីប្រទេសទាំងពីរបានចុះសន្ធិសញ្ញានៅឆ្នាំ១៩៦១ ហើយទណ្ឌកម្មអន្តរជាតិបានដាក់ជាបន្តបន្ទាប់លើក្រុងព្យុងយ៉ាងជុំវិញកម្មវិធីអាវុធនុយក្លេអ៊ែរ និងមីស៊ីល៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសចិន