អាមេរិក ថា ទ័ព រុស្ស៊ី កំពុងផ្ដុំកម្លាំងនៅប្រទេសសម្ព័ន្ធមិត្តមួយនេះ ត្រៀមវាយលុកភាគខាងកើត អ៊ុយក្រែន

មន្ត្រីការពារជាតិជាន់ខ្ពស់អាមេរិកម្នាក់បានចង្អុលបង្ហាញថា រុស្ស៊ីនៅតែបន្តពង្រឹងកងកម្លាំងរបស់ខ្លួនសម្រាប់ការវាយលុកនៅភាគខាងកើតអ៊ុយក្រែន ។

មន្ត្រីរូបនេះបាននិយាយកាលពីថ្ងៃពុធថា មន្ទីរបញ្ចកោណបន្តឃើញចលនា និងសកម្មភាពរបស់កងកម្លាំងរុស្ស៊ីនៅក្នុងប្រទេសបេឡារុស និងរុស្ស៊ីកំពុងប្រមូលផ្តុំគ្នាឡើងវិញសម្រាប់កម្លាំងជំរុញថ្មី ហើយកងទ័ពទាំងនោះត្រូវបានបំពាក់ដោយឧទ្ធម្ភាគចក្រ និងប្រព័ន្ធកាំភ្លើងធំផងដែរ ។

មន្ត្រីរូបនេះក៏បាននិយាយផងដែរថា ជនជាតិរុស្សីបន្តព្យាយាមធ្វើឲ្យប្រសើរឡើងនូវការចល័តទ័ព និងកងកាំភ្លើងរបស់ពួកគេនៅភាគខាងត្បូងនៃទីក្រុង Izyum ក្នុងតំបន់ Kharkiv របស់អ៊ុយក្រែនឆ្ពោះទៅកាន់ការដាក់ពង្រាយនៅភាគខាងកើតអ៊ុយក្រែន ។

មន្ត្រីរូបនេះបាននិយាយថា អង្គភាពរុស្ស៊ីបាននិងកំពុងហូរចូលទៅក្នុងភាគខាងជើងនៃតំបន់ Luhansk របស់អ៊ុយក្រែន បន្ទាប់ពីត្រូវបានប្រមូលផ្ដុំ និងបំពាក់ឡើងវិញនៅតំបន់ Valuyki ភាគខាងលិចនៃប្រទេសរុស្ស៊ី ។

មន្ត្រីរូបនេះបាននិយាយថា ការវាយប្រហារតាមអាកាសរបស់រុស្ស៊ីនៅតែបន្តផ្តោតលើទីក្រុងកំពង់ផែ Mariupol និងតំបន់ផ្សេងទៀតនៅភាគខាងកើតអ៊ុយក្រែន ប៉ុន្តែប្រជាជនអ៊ុយក្រែននៅតែទប់ទល់ និងការពារទីក្រុង ដោយនិយាយថា “យើងនៅតែប្រកាន់យកទីក្រុង Mariupol ជាការប្រកួតប្រជែង” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន បាញ់មីស៊ីលលើនាវាចម្បាំង រុស្ស៊ី ផ្ទុកនាវិក ៥១០ នាក់