យោធាឯកជន អាមេរិក ត្រូវបានសម្លាប់នៅ អ៊ុយក្រែន

ប្រព័ន្ធផ្សព្វផ្សាយបានរាយការណ៍ថា លោក Wily Joseph Cancel អាយុ ២២ ឆ្នាំជាបុគ្គលិកនៃក្រុមហ៊ុនយោធាឯកជនរបស់សហរដ្ឋអាមេរិកត្រូវបានសម្លាប់នៅក្នុងប្រទេសអ៊ុយក្រែន ។

ទន្ទឹមនោះ ម្តាយរបស់គាត់គឺលោកស្រី Rebecca Cabrera បានប្រាប់ទូរទស្សន៍ CNN ថា “ក្រុមហ៊ុនបានបញ្ជូន Wily ទៅប្រយុទ្ធជាមួយកងកម្លាំងអ៊ុយក្រែន ហើយក៏បានឲ្យប្រាក់គាត់ផងដែរ ។ Wily ចង់ទៅទីនោះ ពីព្រោះគាត់ជឿជាក់លើអ្វីដែលអ៊ុយក្រែនកំពុងប្រយុទ្ធ ហើយគាត់ចង់ក្លាយជាផ្នែកមួយដើម្បីអ៊ុយក្រែន” ។

យោងតាមលោកស្រី ​​Cabrera បានឲ្យដឹងថា Wily បានហោះទៅប្រទេសប៉ូឡូញនៅថ្ងៃទី ១២ ខែមីនា ហើយភ្លាមៗនោះបានឆ្លងចូលអ៊ុយក្រែន និងបានប្រយុទ្ធនៅអ៊ុយក្រែនជាមួយមនុស្សមកពីប្រទេសផ្សេងៗគ្នា ហើយចាប់តាំងពីពេលនោះមក Wily មិនបានឃើញត្រឡប់មកផ្ទះវិញទេ ។

ទាហានស៊ីឈ្នួលមកពីប្រទេសផ្សេងៗកំពុងមកដល់អ៊ុយក្រែន ចំពេលមានប្រតិបត្តិការយោធារុស្ស៊ីដែលកំពុងបន្តនៅក្នុងប្រទេស ។

កន្លងមកក្រសួងការបរទេសរុស្ស៊ីបាននិយាយថា ទាហានស៊ីឈ្នួលប្រមាណ ៧,០០០ នាក់មកពីជាង ៦០ ប្រទេសបានមកដល់អ៊ុយក្រែន ចាប់តាំងពីការចាប់ផ្តើមប្រតិបត្តិការយោធាពិសេស ហើយក្នុងចំណោមពួកគេទាំងនោះមានពលរដ្ឋនៃប្រទេសប៉ូឡូញ សហរដ្ឋអាមេរិក កាណាដា ចក្រភពអង់គ្លេស រូម៉ានី និងហ្សកហ្ស៊ី ជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី នឹងមិនអាចកាន់កាប់ភាគខាងកើត អ៊ុយក្រែន មុន “ទិវាជ័យជម្នះ” របស់អតីតសហភាពសូវៀតឡើយ