ជំនួយការលោក Zelensky៖ អ៊ុយក្រែន ត្រូវតែឈ្នះរុស្ស៊ី ឲ្យបាន មុនរដូវរងាចូលមកដល់

លោក Andrey Yermak នាយសេនាធិការរបស់ប្រធានាធិបតី Vladimir Zelensky បាននិយាយនៅក្នុងបទសម្ភាសន៍មួយកាលពីថ្ងៃអង្គារទី១៩ខែកក្កដាថា យោធាអ៊ុយក្រែន ត្រូវតែកម្ចាត់រុស្ស៊ីឲ្យបានមុនរដូវរងាចូលមកដល់។

លោក Yermak និយាយថា “ថ្ងៃនេះ គោលដៅសំខាន់របស់យើង គឺការទទួលជ័យជម្នះ។ ដើម្បីឈ្នះបាន យោធារបស់យើង ចាំបាច់ត្រូវមានអ្វីគ្រប់យ៉ាងដែលពួកគេត្រូវការ។ ពួកគេត្រូវតែមានអ្វីៗគ្រប់យ៉ាង ដូចជាឧបករណ៍គ្រប់គ្រាន់ និងអាវុធគ្រប់គ្រាន់”។

គ្រាន់តែសហរដ្ឋអាមេរិកម្នាក់ឯង បានផ្តល់ជំនួយផ្នែកយោធា និងសេដ្ឋកិច្ចក្នុងទំហំទឹកប្រាក់ជាង ៥៥ ពាន់លានដុល្លារទៅហើយដល់អ៊ុយក្រែន ចាប់តាំងពីខែកុម្ភៈមក ហើយថ្វីបើកម្មវិធីខ្ចីជួល សព្វាវុធរបស់រដ្ឋបាលលោក Joe Biden គ្រោងនឹងដាក់ឲ្យដំណើរការក្នុងខែសីហាក៏ដោយ ប៉ុន្តែលោក Yermak អះអាងថា ពេលវេលាមិនស្ថិតនៅលើភាគីខាងគាត់ទេ។

លោក​បាន​ពន្យល់​ថា​ “​ភារកិច្ច​ចម្បង​នៃ​កម្មវិធីខ្ចីជួល ​គឺ​យើងត្រូវ​ទទួល​បាន​អ្វីៗ​គ្រប់​យ៉ាង ឲ្យ​ទាន់​ពេល​វេលា។ វាមានសារសំខាន់ណាស់សម្រាប់យើង ក្នុងការមិនឲ្យគ្រប់យ៉ាងអូសបន្លាយចូលដល់រដូវរងា។ ក្រោយ​រដូវ​រងា នោះហើយជា​ពេល​ដែល ​រុស្ស៊ី​នឹង​មាន​ពេល​វេលា​ច្រើន​ក្នុង​ការ​ត្រៀមខ្លួនកាន់តែល្អ ដើម្បីធ្វើសង្គ្រាម។ ​ប្រាកដ​ជា​មាន​ការ​លំបាក​ជាង​មុន”។

ទន្ទឹមនោះ នៅពេលសួរថាតើយោធាអ៊ុយក្រែនអាចដណ្តើមយកឆ្នេរសមុទ្រខ្មៅបានវិញ មុនរដូវរងា ដូចដែលរដ្ឋមន្ត្រីការពារជាតិអ៊ុយក្រែនលោក Alexey Reznikov បានប្រាប់ទៅកាសែត Sunday Times របស់ចក្រភពអង់គ្លេសកាលពីដើមខែនេះថា ខ្លួននឹងធ្វើបាន ដែរឬទេ, លោក Yermak មិនបានឆ្លើយដោយផ្ទាល់ទេ ប៉ុន្តែបែរជានិយាយថា “គោលដៅរបស់យើងគឺត្រូវដណ្តើមការកាន់កាប់ ដែនដីរបស់យើងទាំងអស់មកវិញ ដោយមិនកំណត់ពេល”។

ស្របពេលជាមួយគ្នានោះដែរ លោក Yermak បានសារភាពថា “វាជារឿងដ៏លំបាកនៅពេលដែលសត្រូវ មានអាវុធនិងទាហានច្រើនជាងអ្នក”។

តាមការប៉ាន់ស្មានរបស់លោក Reznikov, អ៊ុយក្រែនត្រូវការប្រព័ន្ធកាំភ្លើងធំ M142 HIMARS ប្រហែល ៥០ គ្រឿងពីសហរដ្ឋអាមេរិក ដើម្បីទប់ទល់នឹងយោធារុស្ស៊ី និងជើងទម្របាញ់រ៉ុកកែតបំពាក់លើរថយន្តចំនួន ១០០គ្រឿងដើម្បីធ្វើការវាយបកតបត៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Putin ថា អ៊ុយក្រែន គ្មានបំណងបំពេញតាមលក្ខខណ្ឌ នៃកិច្ចព្រមព្រៀងសន្តិភាពបឋមទេ