UN ព្រមានថា បើដើរខុសតែមួយជំហាន ពិភពលោកនឹងធ្លាក់ចូលទៅក្នុងសង្គ្រាមនុយក្លេអ៊ែរ ដ៏បំផ្លិចបំផ្លាញ (មានវីដេអូ)

អគ្គលេខាធិការអង្គការសហប្រជាជាតិ (UN) បានព្រមានថា បើសិនជាដើរខុសតែមួយជំហាន ពិភពលោកនឹងធ្លាក់ចូលសង្គ្រាមនុយក្លេអ៊ែរដ៏បំផ្លិចបំផ្លាញ ហើយស្ថិតក្នុងគ្រោះថ្នាក់ដែលមិនធ្លាប់ឃើញសោះ ចាប់តាំងពីសង្គ្រាមត្រជាក់មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Antonio Guterres បាន​និយាយ​ថា​ “​រហូត​មក​ដល់​ពេល​នេះ​ យើង​មាន​សំណាងហើយ។ ចំពេលមានភាពតានតឹងកើនឡើងជាសកល បើយល់ខុសតែបន្តិច បើគណនាខុសតែបន្តិច ពិភពលោកនឹងជួបប្រទះសង្គ្រាមនុយក្លេអ៊ែរដ៏បំផ្លិចបំផ្លាញ”។

ហើយលោកបានព្រមានថា ភាពតានតឹងអន្តរជាតិកំពុងឈានដល់កម្រិតខ្ពស់ថ្មី ដោយលោកបានចង្អុលជាពិសេសទៅការលុកលុយនៅអ៊ុយក្រែន ភាពតានតឹងនៅឧបទ្វីបកូរ៉េ និងនៅមជ្ឈិមបូព៌ា។

ការ​ថ្លែង​របស់​លោក​ បាន​ធ្វើ​ឡើង​នៅ​ពេល​បើក​សន្និសីទ​មួយ ​សម្រាប់​ប្រទេស​ដែល​បាន​ចុះ​ហត្ថលេខា​លើ​សន្ធិសញ្ញា​មិន​រីកសាយភាយអាវុធ​នុយក្លេអ៊ែរ (NPT)។

កិច្ចព្រមព្រៀងឆ្នាំ១៩៦៨ ត្រូវបានណែនាំបន្ទាប់ពីវិបត្តិមីស៊ីលគុយបា ដែលជាព្រឹត្ដិការណ៍មួយ ជារឿយៗត្រូវបានពិពណ៌នាថា ពិភពលោកស្ថិតនៅជិតសង្គ្រាមនុយក្លេអ៊ែរបំផុត។

សន្ធិសញ្ញានេះ ត្រូវបានបង្កើតឡើងដើម្បីបញ្ឈប់ការរីករាលដាលអាវុធនុយក្លេអ៊ែរចំពោះប្រទេសជាច្រើនទៀត និងដើម្បីបន្តគោលដៅចុងក្រោយនៃការរំសាយអាវុធនុយក្លេអ៊ែរទាំងស្រុង។

ស្ទើរតែគ្រប់ប្រទេសទាំងអស់នៅលើផែនដី បានចុះហត្ថលេខាលើ NPT រួមទាំងប្រទេសមហាអំណាចនុយក្លេអ៊ែរទាំងប្រាំផងដែរ។ ប៉ុន្តែ​ក្នុង​ចំណោម​រដ្ឋ​មួយ​ចំនួន​តូច ​ដែល​មិន​​ចុះ​ហត្ថលេខា​នោះ មាន​ប្រទេស​ចំនួន ៤ ដែល​គេ​ស្គាល់ ឬ​សង្ស័យ​ថា​មាន​អាវុធ​នុយក្លេអ៊ែរ​ដូចជា ឥណ្ឌា អ៊ីស្រាអែល កូរ៉េ​ខាង​ជើង និង​ប៉ាគីស្ថាន។

សព្វថ្ងៃនេះ អាវុធនុយក្លេអ៊ែរប្រហែល ១៣ ០០០គ្រាប់ ត្រូវបានគេគិតថា នឹងនៅតែមាន ក្នុងឃ្លាំងអាវុធនៃរដ្ឋប្រដាប់អាវុធនុយក្លេអ៊ែរចំនួន៩ ទាបជាងការប៉ាន់ស្មានចំនួន ៦០ ០០០គ្រាប់ ក្នុងកំឡុងពេលឈានដល់កម្រិតកំពូលនៅពាក់កណ្តាលទសវត្សរ៍ឆ្នាំ ១៩៨០៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ លោក ពូទីន បញ្ជាក់ជាថ្មី! កុំឲ្យមានសង្គ្រាមនុយក្លេអ៊ែរឲ្យសោះ គ្មានអ្នកឈ្នះទេ