ព័ត៌មានអន្ដរជាតិ

ក្រោយការគំរាមពីមេដឹកនាំរុស្ស៊ី បេសកជនអាមេរិក ថា «មិនសមជាមហាអំណាច»

បានផុស

១ year មុន

នៅ

ថ្ងៃពុធ ២៨ ឧសភា ២០២៥

ដោយ

បេសកជនពិសេសរបស់សហរដ្ឋអាមេរិកទទួលបន្ទុកអ៊ុយក្រែន លោក Keith Kellogg បានបង្ហោះសារតបតទៅកាន់អនុប្រធានក្រុមប្រឹក្សាសន្តិសុខរុស្ស៊ី លោក ឌីមីទី្រ ម៉េដវ៉េដេវ (Dmitry Medvedev) ដែលគម្រាមកើតសង្គ្រាមលោកលើកទី៣ ថា ខ្វះការប្រុងប្រយ័ត្ន និង មិនសមជាមហាអំណាចឡើយ។

បេសកជនពិសេសរបស់សហរដ្ឋអាមេរិកទទួលបន្ទុកអ៊ុយក្រែន លោក Keith Kellogg។ FB/Keith Kellogg

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Keith Kellogg ដែលជាបេសកជនរបស់លោកដូណាល់ ត្រាំ សម្រាប់ប្រទេសអ៊ុយក្រែននិងរុស្ស៊ី និងបានធ្វើកិច្ចការយ៉ាងសកម្មក្នុងការចរចាជាមួយអ៊ុយក្រែនស្វែងរកដំណោះស្រាយបញ្ចប់សង្គ្រាម បានរិះគន់អតីតប្រធានាធិបតីរុស្ស៊ី លោក ឌីមីទី្រ ម៉េដវ៉េដេវ ចំពោះការបញ្ចេញមតិដែលសំដៅលើការគំរាមកំហែងនៃសង្គ្រាមលោកលើកទី៣ ដោយហៅថា «ខ្វះការប្រុងប្រយ័ត្ន» និង «មិនសមជាមហាអំណាចមួយ»។

លោក Keith Kellogg បានបង្ហោះលើបណ្តាញសង្គម X ថា៖«ប្រធានាធិបតី (ដូណាល់) ត្រាំ…កំពុងធ្វើការដើម្បីបញ្ឈប់សង្រ្គាមនេះ និងបញ្ចប់ការសម្លាប់។ យើងកំពុងរង់ចាំការទទួល (រុស្ស៊ី) អនុស្សរណៈ… ដែលអ្នកបានសន្យាកាលពីមួយសប្តាហ៍មុន។ សូម បញ្ចប់ការបាញ់ប្រហារឥឡូវនេះ»។ នេះយោងតាមការដកស្រង់របស់បណ្តាញសារព័ត៌មាន Kyiv Independent។

អនុប្រធានក្រុមប្រឹក្សាសន្តិសុខរុស្ស៊ី លោក ឌីមីទី្រ ម៉េដវ៉េដេវ (Dmitry Medvedev) បានឆ្លើយតបវិញ ដោយគំរាមកើតសង្គ្រាមលោកលើកទី៣ បន្ទាប់ពីប្រធានាធិបតីសហរដ្ឋអាមេរិក លោក ដូណាល់់ ត្រាំ ដែលបានហៅរុស្ស៊ីកំពុងលេងជាមួយភ្លើង។

ការបង្ហោះសាររបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បង្ហាញឲ្យឃើញពីការអស់ការអត់ធ្មត់ក្នុងការបញ្ចុះបញ្ចូលរុស្ស៊ីឲ្យងាកទៅរកកិច្ចព្រមព្រៀងបទឈប់បាញ់រយៈពេល៣០ថ្ងៃ និង ការចរចាបញ្ចប់សង្គ្រាមនៅអ៊ុយក្រែន៕

ដោយ រ៉ាន់ រើយ