លោក ពូទីន បញ្ជាក់ជាថ្មី! កុំឲ្យមានសង្គ្រាមនុយក្លេអ៊ែរឲ្យសោះ គ្មានអ្នកឈ្នះទេ (មានវីដេអូ)

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃចន្ទទី០១ខែសីហាថា មិនអាចមានអ្នកឈ្នះទេនៅក្នុងសង្គ្រាមនុយក្លេអ៊ែរ ហើយសង្រ្គាមបែបនេះមិនគួរចាប់ផ្តើមឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំវិមានក្រឹមឡាំង បានធ្វើអត្ថាធិប្បាយបែបនេះ នៅក្នុងលិខិតមួយផ្ញើជូនអ្នកចូលរួមនៃសន្និសិទស្តីពីសន្ធិសញ្ញាមិនរីកសាយភាយនុយក្លេអ៊ែរ (NPT) ពោលគឺមានរយៈពេលជាងប្រាំខែ នៃសង្រ្គាមរបស់លោកនៅអ៊ុយក្រែន។

លោកបាននិយាយថា “យើងត្រូវទទួលស្គាល់ការពិតដែលថា មិនអាចមានអ្នកឈ្នះឡើយនៅក្នុងសង្គ្រាមនុយក្លេអ៊ែរ ហើយវាមិនគួរត្រូវបានបង្កឡើងនោះទេ។ យើងឈរសម្រាប់សន្តិសុខស្មើគ្នា និងមិនអាចបំបែកបំបាក់បានសម្រាប់សមាជិកទាំងអស់នៃសហគមន៍ពិភពលោក”។

ពាក្យសម្ដីរបស់លោកទៅកាន់វេទិកា NPT ហាក់ដូចជាមានគោលបំណងបង្ហាញពីការបញ្ជាក់ជាថ្មី និងបង្ហាញថា ប្រទេសរុស្ស៊ីគឺជាមហាអំណាចនុយក្លេអ៊ែរ ដែលមានទំនួលខុសត្រូវ។

នេះផ្ទុយទៅនឹងសេចក្តីថ្លែងការណ៍មុនៗរបស់លោកពូទីន និងអ្នកនយោបាយរុស្ស៊ីផ្សេងទៀតដែលចាត់ទុកលោកខាងលិចថា ជាការគំរាមកំហែងនុយក្លេអ៊ែរពិតៗ។

ក្នុងសុន្ទរកថាមួយកាលពីថ្ងៃទី ២៤ ខែកុម្ភៈ ពេលដែលលោកចាប់ផ្តើមការលុកលុយរបស់រុស្ស៊ីនៅអ៊ុយក្រែន លោកពូទីនបានចង្អុលទៅឃ្លាំងអាវុធនុយក្លេអ៊ែររបស់រុស្ស៊ី និងបានព្រមានមហាអំណាចខាងក្រៅថា ការប៉ុនប៉ងណាមួយដើម្បីជ្រៀតជ្រែក នឹងនាំអ្នកទៅរកផលវិបាកដែលអ្នកមិនធ្លាប់ជួបប្រទះសោះក្នុងប្រវត្តិសាស្ត្ររបស់អ្នក។

ប៉ុន្មាន​ថ្ងៃ​ក្រោយ​មក លោក​បាន​បញ្ជា​ឲ្យ​កងកម្លាំង​នុយក្លេអ៊ែរ​របស់​រុស្ស៊ី​ ត្រូវ​ត្រៀមលក្ខណៈ ប្រុងជើងការខ្ពស់។

សង្រ្គាមនៅអ៊ុយក្រែន បានបង្កើនភាពតានតឹងផ្នែកភូមិសាស្ត្រនយោបាយឈានដល់កម្រិតដែលមិនធ្លាប់ឃើញសោះ ចាប់តាំងពីវិបត្តិមីស៊ីលគុយបាឆ្នាំ១៩៦២មក ដោយអ្នកនយោបាយទាំងនៅក្នុងប្រទេសរុស្ស៊ី និងសហរដ្ឋអាមេរិក បាននិយាយជាសាធារណៈអំពីហានិភ័យនៃសង្គ្រាមលោកលើកទីបី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ លោក ពូទីន ថា សហរដ្ឋអាមេរិក គឺជាការគំរាមកំហែងដ៏ធំចំពោះ រុស្ស៊ី