ចិន កោះហៅឯកអគ្គរដ្ឋទូតអាមេរិក ដើម្បីតវ៉ាប្រឆាំង ដំណើរទស្សនកិច្ចរបស់លោកស្រី Pelosi

ក្រសួងការបរទេសចិនបានកោះហៅឯកអគ្គរដ្ឋទូតអាមេរិកប្រចាំទីក្រុងប៉េកាំង លោក Nicholas Burns ដើម្បីតវ៉ាប្រឆាំងនឹងការធ្វើដំណើររបស់លោកស្រី Nancy Pelosi ទៅកាន់កោះតៃវ៉ាន់។

អនុរដ្ឋមន្ត្រីការបរទេសចិន Xie Feng បាននិយាយថា ដំណើរទស្សនកិច្ចរបស់លោកស្រី Pelosi គឺ “សាហាវណាស់” ហើយបានព្រមានអំពីផលវិបាកធ្ងន់ធ្ងរ។ លោក​ថា ចិន​នឹង​មិន​អង្គុយ​នៅ​ស្ងៀម​ឡើយ។

លោក Xie និយាយថា “នៅទីបំផុត តៃវ៉ាន់នឹងត្រលប់ទៅកាន់មាតុភូមិវិញ។ គ្មានកម្លាំង និងបុគ្គលណាដែលអាចមើលស្រាលលើការតាំងចិត្ត ឆន្ទៈដ៏មុតមាំ និងសមត្ថភាពដ៏អស្ចារ្យ របស់ប្រជាជនចិន ដើម្បី ការពារអធិបតេយ្យភាពជាតិ និងបូរណភាពទឹកដី បាននោះទេ”។

សហរដ្ឋអាមេរិកត្រូវតែបង់ថ្លៃសម្រាប់កំហុសរបស់ខ្លួន។ ប្រទេសចិននឹងចាត់វិធានការឆ្លើយតបជាចាំបាច់ និងម៉ឺងម៉ាត់ ដូចអ្វីដែលយើងនិយាយ។

លោកស្រី Pelosi ដែលបានទៅដល់កោះតៃវ៉ាន់កាលពីយប់ថ្ងៃអង្គារទី០២ខែសីហា ត្រូវបានគេរំពឹងថានឹងជួបប្រជុំជាមួយប្រធានាធិបតី និងប្រធានសភាតៃវ៉ាន់។ លោកស្រី​និយាយ​ថា លោកស្រី​ចង់​គោរព​ការ​ប្តេជ្ញាចិត្ត​មិន​ងាករេ​របស់​អាមេរិក ​ក្នុង​ការ​គាំទ្រ​លទ្ធិប្រជាធិបតេយ្យ​ដ៏រស់រវើក​របស់​តៃវ៉ាន់៕

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ថ្កោលទោសដំណើរទស្សនកិច្ចរបស់លោកស្រី Pelosi ទៅកោះតៃវ៉ាន់ ថាជា “គ្រោះថ្នាក់ខ្លាំងបំផុត”