អាមេរិក ផ្ដល់កញ្ចប់ទឹកប្រាក់រាប់លានដុល្លារដល់ក្រុមហ៊ុនផលិតអាវុធ សម្រាប់ទិញមីស៊ីល

ក្រសួងការពារជាតិអាមេរិកបានប្រកាសផ្តល់កិច្ចសន្យាក្នុងទំហំទឹកប្រាក់ចំនួន ៧៧.៤ លានដុល្លារដល់ក្រុមហ៊ុន Lockheed Martin ដើម្បីទិញកាំជ្រួចមីស៊ីលវាយប្រហារចំនួន ៥៤ គ្រាប់ត្រឹមខែកញ្ញា ឆ្នាំ ២០២៥ ។

ក្រសួងការពារជាតិបាននិយាយកាលពីថ្ងៃចន្ទថា “ក្រុមហ៊ុន Lockheed Martin Missiles and Fire Control ដែលមានទីតាំងនៅក្នុងទីក្រុង Grand Prairie របស់រដ្ឋ Texas បានទទួលប្រាក់ ៧៧,៤២០,០០០ ដុល្លារក្នុងកិច្ចសន្យាសម្រាប់ការទិញកាំជ្រួចមីស៊ីលវាយប្រហារចំនួន ៥៤ គ្រាប់” ។

កាំជ្រួចមីស៊ីលនេះ គឺជាមីស៊ីលផ្លោងយុទ្ធសាស្ត្រដែលត្រូវបានបង្កើតឡើងដើម្បីជំនួសប្រព័ន្ធមីស៊ីលវាយប្រហារបាញ់ពីដីទៅអាកាស (ATACMS) នាពេលបច្ចុប្បន្ននេះ ។

ក្រសួងការពារជាតិបាននិយាយថា ខ្លួនមានការស្ទាក់ស្ទើរក្នុងការផ្តល់កាំជ្រួចមីស៊ីលរយៈចម្ងាយឆ្ងាយបែបនេះពីស្តុករបស់អាមេរិកទៅកាន់ប្រទេសអ៊ុយក្រែន ដោយសារតែមានការព្រួយបារម្ភថា រុស្ស៊ីអាចចាត់ទុកវាថាជាបង្កើនជម្លោះថែមទៀត ។

ជាចុងក្រោយក្រសួងការពារជាតិបានបន្ថែមថា ក្រុមហ៊ុន Lockheed Martin ត្រូវបានគេរំពឹងថានឹងបញ្ចប់ការងារក្នុងកិច្ចសន្យានេះត្រឹមថ្ងៃទី ៣០ ខែកញ្ញា ឆ្នាំ ២០២៥ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន ថា អាមេរិក បញ្ជូនសញ្ញា “ខុស និងគ្រោះថ្នាក់ខ្លាំង” អំពី តៃវ៉ាន់