មនុស្ស២៨នាក់ត្រូវសម្លាប់ក្នុងការវាយប្រហារលើរថយន្តក្រុងនៅ ស៊ីរី

រថយន្តក្រុងមួយគ្រឿងត្រូវបានវាយប្រហារនៅភាគខាងកើតប្រទេសស៊ីរីដោយមនុស្សចំនួន២៨នាក់ត្រូវបាត់បង់ជីវិត។

ប្រព័ន្ធផ្សព្វផ្សាយរដ្ឋស៊ីរីបានរាយការណ៍ថា រថយន្ដក្រុងត្រូវបានកំណត់គោលដៅកាលពីថ្ងៃពុធនៅក្នុងខេត្ត Deir al-Zour។

ប្រភពផ្សេងទៀតរួមទាំងក្រុមឃ្លាំមើលផងដែរបាននិយាយថា រថយន្តនោះគឺដឹកទាហានហើយចំនួនអ្នកស្លាប់គឺខ្ពស់ជាងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនមានការអះអាងទទួលខុសត្រូវភ្លាមៗចំពោះការវាយប្រហារនេះទេ។

ក្រុមឃ្លាំមើលសិទ្ធិមនុស្សស៊ីរី (SOHR) មានមូលដ្ឋាននៅចក្រភពអង់គ្លេសបានចង្អុលការវាយប្រហារនេះទៅលើក្រុមជីហាដរដ្ឋឥស្លាម (IS) ដោយនិយាយថា ទាហាន៣៧នាក់បានស្លាប់។

SOHR បាននិយាយថា ការវាយប្រហារនេះគឺជាការវាយឆ្មក់ដែលបានគ្រោងទុកយ៉ាងល្អដោយសមាជិកក្រុមរដ្ឋឥស្លាមដោយផ្តោតលើរថយន្តក្រុងចំនួន៣គ្រឿងដែលដឹកក្រុមសកម្មប្រយុទ្ធគាំទ្ររដ្ឋាភិបាលនិងទាហាន។

ក្រុមអ្នកប្រយុទ្ធ IS និងកងទ័ពស៊ីរីស្មោះត្រង់នឹងរដ្ឋាភិបាលរបស់ប្រធានាធិបតីស៊ីរីលោក Bashar al-Assad តែងតែប៉ះទង្គិចគ្នានៅតំបន់ក្បែរទីក្រុង Palmyra។

ក្នុងឆ្នាំ២០១៤ ក្រុម IS បានដាក់ការគ្រប់គ្រងដ៏ឃោរឃៅរបស់ខ្លួនលើប្រជាជនរាប់លាននាក់ហើយក្នុងដំណាក់កាលមួយ ខ្លួនបានគ្រប់គ្រងទឹកដីទំហំ៨៨,០០០គីឡូម៉ែត្រក្រឡាដែលលាតសន្ធឹងពីភាគខាងលិចប្រទេសស៊ីរីរហូតដល់ភាគខាងកើតប្រទេសអ៊ីរ៉ាក់។

បន្ទាប់ពីការប្រយុទ្ធគ្នាអស់រយៈពេល៥ឆ្នាំ កងកម្លាំងមូលដ្ឋានដែលគាំទ្រដោយសហរដ្ឋអាមេរិកនិងសម្ព័ន្ធមិត្តរបស់ខ្លួនបានដណ្តើមការកាន់កាប់ទឹកដីទាំងអស់ដែលគ្រប់គ្រងដោយក្រុម IS មកវិញ។

ក្រុម IS ត្រូវបានប្រកាសថាចាញ់ទឹកដីនៅស៊ីរីនិងអ៊ីរ៉ាក់ក្នុងខែមីនាឆ្នាំ២០១៩៕

ប្រែសម្រួលដោយ៖ Vann Vann

ប្រភព៖ BBC