ពេទ្យ ចិន លុបចោលការសប្បាយថ្ងៃឆ្លងឆ្នាំ ដើម្បីយកពេលមើលថែអ្នកជំងឺ ចំពេលកូវីដរាលដាលខ្លាំង

មន្ទីរពេទ្យជាច្រើននៅទីក្រុងនានារបស់ប្រទេសចិន បានលុបចោលការឈប់សម្រាកថ្ងៃឆ្លងឆ្នាំសកលរបស់ខ្លួន ដោយយកពេលនៅមើលថែអ្នកជំងឺ​​ជំនួសវិញ ស្របពេលកំពុងមានការរាលដាលនៃជំងឺកូវីដ ១៩ ។

មិនត្រឹមតែមិនបានឈប់សម្រាកជួបជុំគ្រួសារនោះឡើយ គ្រូពេទ្យជាច្រើននាំគ្នាធ្វើការងារថែមម៉ោងទៀតដើម្បីបង្កើនប្រសិទ្ធភាពគោលនយោបាយបង្ការ​ជំងឺរាតត្បាត និងធានាការព្យាបាលដល់អ្នកជំងឺ ។

បើយោងតាម​សារព័ត៌មានបានចុះផ្សាយ មន្ទីរពេទ្យទាំងនោះមានដូចជា ពេទ្យ Third Municipal ក្នុងទីក្រុង Qinhuangdao នៃខេត្ត Hebei ភាគខាងជើងប្រទេសចិន, មន្ទីរពេទ្យក្នុងខេត្ត Shanxi, ខេត្ត Hunan, ខេត្ត Jiangsu, ខេត្ត Shaanxi និងខេត្ត Heilongjiang ជាដើម ។

គួរឱ្យដឹងថា ស្ថានភាពជំងឺកូវីដ ១៩ នាពេលបច្ចុប្បន្នក្នុងប្រទេសចិន គឺនៅតែ​មិនទាន់មានភាពធូរស្បើយប៉ុន្មានឡើយ ទោះបីជាពេលថ្មីៗនេះ រដ្ឋាភិបាលចិនប្រកាស​លើកលែងច្បាប់រឹតបន្តឹងកូវីដ ១៩ ក៏ដោយ ។ ម្យ៉ាងទៀត ការធ្វើដំណើរចេញទៅក្រៅប្រទេសរបស់ជនជាតិចិន គឺនៅតែទាមទារលទ្ធផលនៃការធ្វើតេស្តដដែល ៕

ប្រែសម្រួលដោយ ៖ រតនៈ

ប្រភព ៖ Global Times

ចុចអាន ៖ តៃវ៉ាន់ ប្រាប់ ចិន ថា សង្គ្រាមមិនដែលជាជម្រើសដោះស្រាយបញ្ហានោះទេ