អ៊ុយក្រែន បញ្ចប់តំណែងមន្ត្រីជាន់ខ្ពស់ច្រើននាក់ ពាក់ព័ន្ធអំពើពុករលួយ អំឡុងពេលប្រទេសមានសង្គ្រាម (មានវីដេអូ)

មន្ត្រីជាន់ខ្ពស់អ៊ុយក្រែនជាច្រើននាក់ ត្រូវបានរដ្ឋាភិបាលរបស់ប្រទេសនេះ បណ្តេញចេញពីតំណែងកាលពីថ្ងៃអង្គារទី២៤ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរុះរើដែលកំពុងបន្ត ត្រូវបានប្រកាសដោយប្រធានាធិបតីអ៊ុយក្រែនលោក Vladimir Zelensky នៅក្នុងសុន្ទរកថាវីដេអូប្រចាំថ្ងៃរបស់គាត់។

រដ្ឋាភិបាលបានបណ្តេញអនុរដ្ឋមន្ត្រីការពារជាតិលោក Vyacheslav Shapovalov, អនុរដ្ឋមន្ត្រីគោលនយោបាយសង្គមលោក Vitaly Muzychenko ក៏ដូចជាអនុរដ្ឋមន្ត្រីក្រសួងអភិវឌ្ឍន៍តំបន់ចំនួនពីររូបគឺលោក Vyacheslav Negoda និងលោក Ivan Lukerya។

ការបណ្តេញលោក Shapovalov គឺដោយសារតែរឿងអាស្រូវពុករលួយនៅក្នុងក្រសួង ខណៈមានការចោទប្រកាន់ថា ក្រសួងបាននិងកំពុងទិញស្បៀងសម្រាប់កងទ័ព ក្នុងតម្លៃខ្ពស់កប់ពពក។

ក្រៅ​ពីមន្ត្រីខាងលើ រដ្ឋាភិបាល​ក៏​បាន​បណ្ដេញ​ប្រធាន​រដ្ឋបាល​យោធា​ក្នុង​តំបន់​ជា​ច្រើន​រូប រួម​ទាំង​លោក Aleksey Kuleba ប្រចាំ​តំបន់ កៀវ ផង​ដែរ។

អគ្គរដ្ឋអាជ្ញារងលោក Aleksey Simonenko បានក្លាយជាជនរងគ្រោះម្នាក់ទៀតនៃការរុះរើដែលកំពុងបន្តនេះ ហើយក៏ត្រូវបានបណ្តេញចេញកាលពីថ្ងៃអង្គារផងដែរ។

មន្ត្រី​រូប​នេះ មាន​ជាប់​ពាក់ព័ន្ធ​នឹង​រឿង​អាស្រូវ​ជា​សាធារណៈ​កាលពី​ដើម​ខែ​នេះ បន្ទាប់​ពី​បាន​ចំណាយ​ពេលសប្បាយរីករាយនៅថ្ងៃ​ចូល​ឆ្នាំ​ថ្មី​ក្នុង​ប្រទេស​អេស្ប៉ាញ។

ក្រៅ​ពី​ធ្វើឲ្យគេមិនសប្បាយចិត្តដោយសារ​ការ​សម្រាក​លំហែ​កាយ​នៅ​រមណីយដ្ឋាន​បរទេស​ក្នុង​អំឡុង​ពេល​ប្រទេសមានជម្លោះ​យោធា​ជាមួយ​រុស្ស៊ី មន្ត្រី​រូប​នេះក៏​បាន​ប្រឈម​នឹង​ការ​ចោទ​ប្រកាន់​​អំពើ​ពុក​រលួយផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ សេចក្តីរាយការណ៍៖ អាមេរិកនិងអាល្លឺម៉ង់ សម្រេចបញ្ជូនរថក្រោះទៅ អ៊ុយក្រែន ហើយ