លោក Zelensky ជំរុញឲ្យបស្ចិមប្រទេស បញ្ជូនរថក្រោះ លឿនបន្តិចមក

ប្រធានាធិបតីអ៊ុយក្រែន បានថ្លែងអំណរគុណដល់មេដឹកនាំលោកខាងលិច ដែលបានបញ្ជូនរថក្រោះទៅគាំទ្រការប្រយុទ្ធជាមួយរុស្ស៊ី ប៉ុន្តែនិយាយថា រថក្រោះទាំងនោះ ត្រូវបញ្ជូនឲ្យបានឆាប់បន្តិចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាពេលរាត្រី លោក Volodymyr Zelensky ក៏បានជំរុញឲ្យលោកខាងលិច បញ្ជូនមីស៊ីលរយៈចម្ងាយឆ្ងាយ និងយន្តហោះចម្បាំងផងដែរ។

លោក Zelensky និយាយថា “ខ្ញុំបាននិយាយជាមួយអគ្គលេខាធិការអង្គការណាតូ លោក Jens Stoltenberg នៅថ្ងៃនេះ។ យើងក៏ត្រូវតែបញ្ជូនមីស៊ីលរយៈចម្ងាយឆ្ងាយទៅកាន់អ៊ុយក្រែនផងដែរ។ នោះជារឿងសំខាន់ យើងត្រូវតែពង្រីកកិច្ចសហប្រតិបត្តិការរបស់យើង។ នេះគឺជាសុបិន ហើយនេះគឺជាកិច្ចការមួយ”។

ការអត្ថាធិប្បាយរបស់គាត់ បានកើតឡើងបន្ទាប់ពីសហរដ្ឋអាមេរិក និងអាល្លឺម៉ង់ប្រកាសថា ពួកគេនឹងបញ្ជូនរថក្រោះ Abrams និង Leopard ទៅឲ្យទីក្រុងកៀវ។

សហរដ្ឋអាមេរិក បានប្រកាសបញ្ជូនរថក្រោះប្រយុទ្ធ M1 Abrams ដ៏មានឥទ្ធិពលចំនួន៣១គ្រឿងទៅកាន់ប្រទេសអ៊ុយក្រែន ខណៈអាល្លឺម៉ង់​ ក៏បញ្ជូនរថក្រោះ Leopard 2 ចំនួន១៤គ្រឿងទៅកាន់សមរភូមិផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ បន្ទាប់ពីរថក្រោះ ឥឡូវ អ៊ុយក្រែន ចង់បានយន្តហោះចម្បាំង និង មីស៊ីលរយៈចម្ងាយឆ្ងាយ ទៀត