រញ្ជួយដីខ្លាំងក្លា រង្គើ៦ប្រទេស សម្លាប់មនុស្សជាង ៣០០នាក់

គិតត្រឹមពេលនេះ មនុស្សជាង៣០០នាក់ហើយ បានស្លាប់នៅក្នុងប្រទេសតួកគី និងស៊ីរី បន្ទាប់ពីគ្រោះរញ្ជួយដីកម្រិត ៧.៨រ៉ិចទ័រ វាយប្រហារភាគអាគ្នេយ៍ប្រទេសតួកគីនៅថ្ងៃចន្ទទី០៦ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយដីនេះ បានវាយប្រហារនៅម៉ោង ៤និង១៧នាទីព្រឹក (ម៉ោងក្នុងស្រុក) ហើយបានធ្វើឲ្យរង្គើក្នុងប្រទេសស៊ីរី តួកគី លីបង់ ស៊ីប ក្រិកនិងអ៊ីស្រាអែល។

ការរញ្ជួយដីនេះ មានចម្ងាយប្រហែល៣២គីឡូម៉ែត្រពីទីក្រុង Gaziantep និងប្រហែល ២៦គីឡូម៉ែត្រពីទីក្រុង Nurdağı នៃប្រទេសតួកគី។

យោងតាមក្រុមស្ទាបស្ទង់ភូមិសាស្ត្រអាមេរិក, ការរញ្ជួយមានជម្រៅ ១៧.៧គីឡូម៉ែត្រ ហើយរំញ័រ ៦.៧រ៉ិចទ័រដ៏ខ្លាំងមួយទៀត បានកើតឡើងនៅប្រហែល១០នាទីក្រោយមក។

AFP ផ្សាយថា មនុស្សយ៉ាងតិច៧៦នាក់បានស្លាប់នៅក្នុងប្រទេសតួកគី ខណៈនៅស៊ីរី មានអ្នកស្លាប់២៤៥នាក់។ ចំនួនអ្នកស្លាប់នៅក្នុងប្រទេសទាំងពីរ ត្រូវបានគេរំពឹងថា នឹងកើនឡើងទៀត។

រដ្ឋមន្ត្រីក្រសួងមហាផ្ទៃតួកគី លោក Süleyman Soylu បាននិយាយថា ទីក្រុងចំនួន១០ បានរងផលប៉ះពាល់ដោយការរញ្ជួយដីនេះ។

ថ្លែងទៅកាន់អ្នកសារព័ត៌មាននៅថ្ងៃចន្ទ ក្រុមមន្ត្រីបាននិយាយថា ទីក្រុង Gaziantep, Kahramanmaraş, Hatay, Osmaniye, Adiyaman, Malatya, Sanliurfa, Adana, Diyarbakir និង Kilis បានរងការខូចខាតទាំងអស់៕

ប្រែសម្រួល៖ Vann Vann

ប្រភព៖ Guardian

ចុចអាន៖ មនុស្សស្លាប់ដោយសាររញ្ជួយដីនៅស៊ីរី កើនដល់ ២៣៧នាក់