មកដឹង ពេលវេលាដែល អ៊ុយក្រែន អាចទទួលបានយន្តហោះចម្បាំង

រដ្ឋមន្ត្រីការពារជាតិអង់គ្លេសលោក Ben Wallace បានប្រាប់សារព័ត៌មាន German Weekly កាលពីពេលថ្មីៗនេះថា អ៊ុយក្រែននឹងទទួលបានយន្តហោះចម្បាំងទំនើបៗដូចជា Eurofighter Typhoon លុះត្រាតែចប់ជម្លោះនៅក្នុងប្រទេស ។

លោក Wallace បាននិយាយថា មិនមានការបញ្ជូនយន្តហោះចម្បាំងណាមួយទៅកាន់អ៊ុយក្រែនភ្លាមៗនោះទេ ហើយបើមានការបញ្ជូនយន្តហោះណាមួយនោះ ក៏ក្នុងរយៈពេល ៦ ខែខាងមុខ ឬយ៉ាងហោចណាស់ក៏ស្ថិតក្នុងដំណាក់កាលចុងក្រោយនៃជម្លោះជាមួយរុស្ស៊ីដែរ ។

នៅពេលនិយាយអំពីយន្តហោះទំនើបៗដូចជា យន្តហោះធុន Eurofighter Typhoon ដែលនឹងបញ្ជូនទៅកាន់ប្រទេសអ៊ុយក្រែន លុះត្រាតែបញ្ចប់ជម្លោះនោះ, ប្រមុខការពារជាតិអង់គ្លេសរូបនេះបាននិយាយថា គោលការណ៍នេះគឺមានការយល់ស្រប និងឯកភាពពីសំណាក់ដៃគូលោកខាងលិចរបស់យើង ។

យន្តហោះចម្បាំង Eurofighter Typhoon គឺជាយន្តហោះចម្បាំងពហុមុខងារជំនាន់ទី ៤ របស់អឺរ៉ុប ដែលរចនាឡើងដោយសម្ព័ន្ធក្រុមហ៊ុនអង់គ្លេស អាល្លឺម៉ង់ អេស្ប៉ាញ និងអ៊ីតាលី ហើយដាក់ឲ្យដំណើរការប្រើប្រាស់ក្នុងប្រតិបត្តិការកាលពីឆ្នាំ ២០០៣ ។

កាលពីសប្តាហ៍មុន ប្រធានាធិបតីអ៊ុយក្រែន លោក Volodymyr Zelensky បានស្នើឲ្យសភាចក្រភពអង់គ្លេស បញ្ជូនយន្តហោះចម្បាំងទៅកាន់ទីក្រុងកៀវ ខណៈនៅថ្ងៃដដែលនោះ នាយករដ្ឋមន្ត្រីអង់គ្លេសលោក Rishi Sunak ក៏បានចេញបញ្ជាឲ្យពង្រីកបេសកកម្មហ្វឹកហ្វឺនដល់ទាហានអ៊ុយក្រែនឲ្យចេះបើកយន្តហោះចម្បាំង និងនាវាចម្បាំងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន អះអាងថា រុស្ស៊ី ទើបតែប្រើមីស៊ីលជំនាន់ឆ្នាំ ៦០ ប៉ុណ្ណោះ