លោក Zelensky ថា អនាគតរបស់ UN ត្រូវសម្រេចនៅ អ៊ុយក្រែន

បន្ទាប់ពីជំនួបជាមួយអគ្គលេខាធិការអង្គការសហប្រជាជាតិ (UN) លោក Antonio Guterres កាលពីថ្ងៃទី៨ ខែមីនា លោកប្រធានាធិបតី Volodymyr Zelensky បាននិយាយថា បច្ចុប្បន្នអនាគតរបស់ UN កំពុងត្រូវបានសម្រេចនៅអ៊ុយក្រែន ។

លោក Zelensky បានលើកឡើងថា “ឥឡូវនេះទីក្រុងកៀវកំពុងការពារគោលដៅ និងគោលការណ៍នៃធម្មនុញ្ញរបស់អង្គការសហប្រជាជាតិ ដូច្នេះអ្វីៗគួរតែត្រូវសម្រេចនៅក្នុងប្រទេសអ៊ុយក្រែន” ។

យោងតាមការិយាល័យប្រធានាធិបតីបានឲ្យដឹងថា នៅទីក្រុងកៀវលោក Zelensky និងលោក Guterres បានពិភាក្សាគ្នាអំពីបញ្ហាសន្តិសុខ ការអនុវត្តរូបមន្តសន្តិភាពអ៊ុយក្រែន មធ្យោបាយដើម្បីបញ្ជូនជនជាតិអ៊ុយក្រែនរាប់ពាន់នាក់ដែលបានផ្លាស់ទីលំនៅទៅរុស្ស៊ីដោយបង្ខំ ក្នុងអំឡុងសង្គ្រាមទ្រង់ទ្រាយធំ និងការបង្កើតសាលាក្តីពិសេសសម្រាប់ឧក្រិដ្ឋកម្មសង្គ្រាមលុកលុយរបស់រុស្ស៊ី ។

ទន្ទឹមនោះ ប្រធានាធិបតីអ៊ុយក្រែន និងប្រធាន UN ក៏បានប៉ះប៉ូវបញ្ហានុយក្លេអ៊ែររបស់រុស្ស៊ី និងការស្ដារឡើងវិញនូវសុវត្ថិភាពនៃរោងចក្រថាមពលនុយក្លេអ៊ែរអ៊ុយក្រែនទាំងអស់ ដែលត្រូវបានរំលោភដោយរុស្ស៊ី ។

ជាចុងក្រោយលោក Guterres បានឲ្យដឹងថា UN អាចផ្តល់ការសម្រុះសម្រួលដើម្បីសម្រេចបាននូវការរំសាយទាំងស្រុងនូវរោងចក្រថាមពលនុយក្លេអ៊ែរ Zaporizhzhia ដែលកាន់កាប់ដោយកងកម្លាំងរុស្ស៊ី ដោយធានាឲ្យមានការបន្តប្រតិបត្តិការជាប្រចាំឡើងវិញ ៕

ប្រែសម្រួលដោយ ៖ ជីវ័ន្ត

ប្រភព ៖ Kyiv Independent

ចុចអាន ៖ ប្រមុខណាតូថា អ្នកមើលស្រាល រុស្ស៊ី គឺខុសហើយ