អនុរដ្ឋលេខាធិការកងទ័ពអាមេរិកលោក Gabe Camarillo បាននិយាយកាលពីថ្ងៃចន្ទថា សហរដ្ឋអាមេរិកនឹងធ្វើការវិនិយោគបន្ថែមទៀតដើម្បីបង្កើនការទិញមីស៊ីល Patriot និងមីស៊ីល Tomahawk ក្រោមសំណើថវិការបស់មន្ទីរបញ្ចកោណសម្រាប់ឆ្នាំ ២០២៤ ។

លោក Camarillo បានបន្ថែមថា មន្ទីរបញ្ចកោណក៏គ្រោងនឹងចំណាយប្រាក់ចំនួន ៩៤២ លានដុល្លារលើប្រព័ន្ធរ៉ុកកែតដែលអាចបាញ់ចេញបានរយៈចម្ងាយឆ្ងាយ (GMLRS) និង ២២១ លានដុល្លារបន្ថែមទៀតលើគ្រាប់រំសេវ ១៥៥ មីលីម៉ែត្រ ។

ដោយឡែកលោកនាយឧត្តមសេនីយ៍ Mark Bennett ប្រធានផ្នែកហិរញ្ញវត្ថុរបស់កងទ័ពក៏បានកត់សម្គាល់ផងដែរថា ការកើនឡើងនៃការផ្គត់ផ្គត់សព្វាវុធសម្រាប់ឆ្នាំហិរញ្ញវត្ថុ ២០២៤ រួមមាន ៥៨៤ លានដុល្លារសម្រាប់គ្រាប់រំសេវនៃមីស៊ីលវាយប្រហារជាក់លាក់ និង ១.២ ពាន់លានដុល្លារសម្រាប់ផ្នែកនៃមីស៊ីល Patriot ។

ស្របពេលជាមួយគ្នានេះ រដ្ឋមន្ត្រីការពារជាតិអាមេរិក លោក Lloyd Austin បាននិយាយនៅក្នុងសេចក្តីថ្លែងការណ៍មួយថា ថវិកាការពារជាតិឆ្នាំ ២០២៤ នឹងផ្តល់មូលនិធិចំនួន ១៧០ ពាន់លានដុល្លារសម្រាប់ការផ្គត់ផ្គង់សរុប ហើយវាក៏ជាការវិនិយោគដ៏ធំបំផុត នៅក្នុងប្រវត្តិសាស្រ្តរបស់ក្រសួងការពារជាតិ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik