ក្រុងសេអ៊ូល ៖ កូរ៉េខាងជើង ប្រហារជីវិតមនុស្ស ដោយសារមើលវីដេអូរបស់ កូរ៉េខាងត្បូង

ទីក្រុងសេអ៊ូលបានអះអាងនៅក្នុងរបាយការណ៍ចុងក្រោយដែលបានចេញផ្សាយកាលពីថ្ងៃសុក្រថា អាជ្ញាធរកូរ៉េខាងជើងបានប្រហារជីវិតមនុស្ស ក្រោមបទចោទប្រកាន់សង្ស័យកំពុងមើល និងផ្សព្វផ្សាយវីដេអូដែលផលិតនៅប្រទេសកូរ៉េខាងត្បូង ។

នៅឆ្នាំ ២០២០ ប្រទេសកូរ៉េខាងជើងបានអនុវត្តច្បាប់ថ្មីមួយដោយដាក់ទោសទណ្ឌមនុស្សរហូតដល់ ១០ ឆ្នាំ ជាមួយនឹងការធ្វើទារុណកម្ម ដូចជាធ្វើការងារលំបាកៗ ប្រសិនបើរកឃើញថាមានទោសពីបទផ្សព្វផ្សាយវប្បធម៌ខាងក្រៅចូលមកក្នុងប្រទេស ។

យោងតាមក្រសួងបង្រួបបង្រួមកូរ៉េខាងត្បូងបានឲ្យដឹងថា ចាប់តាំងពីឆ្នាំ ២០១៧ ដល់ឆ្នាំ ២០២២ ក្រសួងបានបញ្ចូលករណីរំលោភសិទ្ធិមនុស្សនៅកូរ៉េខាងជើងប្រហែល ១,៦០០ ករណីនៅក្នុងរបាយការណ៍ដែលមានកម្រាស់ចំនួន ៤៥០ ទំព័រ ។

ក្រសួងក៏បានអះអាងដែរថា អាជ្ញាធរកូរ៉េខាងជើងបានប្រហារជីវិតស្ត្រីជាសាធារណៈក្នុងឆ្នាំ ២០១៧ ដើម្បីឆ្លើយតបទៅនឹងការចែកចាយវីដេអូដែលនាងកំពុងរាំ និងចង្អុលម្រាមដៃទៅកាន់រូបភាពរបស់ស្ថាបនិកកូរ៉េខាងជើងគឺលោក គីម អ៊ីលស៊ុង ។

យោងតាមរបាយការណ៍បានឲ្យទៀតដឹងថា អាជ្ញាធរក៏បានបាញ់សម្លាប់យុវជនចំនួន ៦ នាក់ដែលមានអាយុពី ១៦ ទៅ ១៧ ឆ្នាំផងដែរ ដោយចោទប្រកាន់ពីបទមើលវីដេអូ និងប្រើប្រាស់អាភៀននៅក្នុងហេតុការណ៍ផ្សេងៗគ្នា ។

គួរបញ្ជាក់ថា សកម្មភាពដែលក្រសួងបង្រួបបង្រួមកូរ៉េខាងត្បូងចាត់ទុកជាការរំលោភសិទ្ធមនុស្សនៅកូរ៉េខាងជើង រួមមានការធ្វើទារុណកម្ម អំពើហិង្សាផ្លូវភេទ និងការពិសោធន៍វេជ្ជសាស្ត្រលើរាងកាយមនុស្សដែលមានបញ្ហាផ្លូវចិត្តទាំងបង្ខំជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ២ ខែទៀតទើប អ៊ុយក្រែន អាចប្រើរថក្រោះខ្លារខិន Leopard លើសមរភូមិ​ប្រយុទ្ធបាន