ព័ត៌មានអន្ដរជាតិ

អ្នកកាសែតអន្តរជាតិ ចែករំលែកវិធីប្រយុទ្ធប្រឆាំងព័ត៌មានក្លែងក្លាយ

បានផុស

១ ខែ មុន

នៅ

ថ្ងៃសៅរ៍ ១ មេសា ២០២៣

ដោយ

អ្នកសារព័ត៌មានអន្តរជាតិបានចែករំលែកអំពីរបៀបដោះស្រាយ ក៏ដូចជាប្រយុទ្ធប្រឆាំងព័ត៌មានមិនពិត និងយល់ច្បាស់ពីការផ្សព្វផ្សាយដោយយុត្តិធម៌ ខណៈដែលបច្ចុប្បន្នព័ត៌មានកំពុងតែប្រជ្រៀតចូលបានយ៉ាងងាយស្រួលតាមរយៈប្រព័ន្ធអ៊ីនធឺណិត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មាន Trust in News ដែលធ្វើឡើងរួមគ្នានៅទីក្រុងឡុងដ៍ និងក្រុងដេលី និងមានការចូលរួមពីមន្ត្រីចំនួន ៣០ នាក់មកពីស្ថាប័នសារព័ត៌មានចំនួន ១៤ ប្រទេស គឺជាផ្នែកមួយនៃគំនិតផ្តួចផ្តើមដែលដឹកនាំដោយទូរទស្សន៍ BBC របស់អង់គ្លេស ។

អ្នកយកព័ត៌មាន AFP របស់បារាំងបាននិយាយថា ដើម្បីដឹងថាវាជាព័ត៌មានពិត ឬក្លែងក្លាយ ទីភ្នាក់ងាររព័ត៌មានរបស់យើងបានពិនិត្យពិចៃយ៉ាងម៉ត់ចត់ ។ ពាក់ព័ន្ធនឹងសង្គ្រាមរុស្ស៊ី និងអ៊ុយក្រែន ទីភ្នាក់ងារព័ត៌មានបានវិភាគរូបភាពផ្កាយរណបម្ដងហើយម្ដងទៀត ដើម្បីបញ្ជាក់ថា កងកម្លាំងរុស្ស៊ីបានសម្លាប់ពលរដ្ឋនៅខាងក្រៅរដ្ឋធានីកៀវរបស់ប្រទេសអ៊ុយក្រែនកាលពីឆ្នាំមុនឬក៏អត់ ហើយឆ្លងកាត់វិនិច្ឆ័យយ៉ាងល្អិតល្អន់ យើងសូមបដិសេធថា រុស្ស៊ីមិនបានសម្លាប់ជនស៊ីវិលក្នុងតំបន់នោះទេ ។

ចំណែកក្រុមរបស់ BBC វិញបានឡើងលើកថា ដើម្បីឲ្យប្រាកដថាវាជាព័ត៌មានពិត ស្ថាប័ន BBC ត្រូវពិនិត្យវីដេអូជាង ២ ម៉ឺនឃ្លីប ។ ជាក់ស្ដែង BBC បានពិនិត្យយ៉ាងយកទុកដាក់នូវវីដេអូដែលថតបានដោយពលរដ្ឋនៅទូទាំងប្រទេសអ៊ីរ៉ង់ ដើម្បីកំណត់នូវអ្វីដែលបានកើតឡើង ក្នុងអំឡុងពេលការតវ៉ាទ្រង់ទ្រាយធំដែលបានចាប់ផ្តើមកាលពីខែកញ្ញាឆ្នាំមុន ។

ប្រព័ន្ធផ្សព្វផ្សាយមួយចំនួនបានបន្តបិទបាំងការប្រមូលផ្តុំនេះ ជាពិសេសមានការហាមឃាត់អ្នកសារព័ត៌មានខ្លះមិនឲ្យចូលយកព័ត៌មាននៅក្នុងភាពចលាចលនោះ ។ ប៉ុន្តែទោះជាយ៉ាងណា ការតវ៉ាត្រូវបានបញ្ចប់ បន្ទាប់ពីមានការស្លាប់របស់ស្ត្រីម្នាក់នៅក្នុងការឃុំឃាំងរបស់ប៉ូលិស ក្រោយត្រូវបានចាប់ខ្លួនពីបទស្លៀកពាក់មិនសមរម្យ ។

ដោយឡែកអ្នកឆ្លើយឆ្លងព័ត៌មាន NHK ម្នាក់បានពន្យល់ពីការបង្ហោះព័ត៌មានមិនពិតតាមបណ្ដាញ Twitter ពាក់ព័ន្ធទៅនឹងគ្រោះរញ្ជួយដីដ៏ធំ ដែលបានវាយប្រហារប្រទេសតួកគី និងស៊ីរីកាលពីខែកុម្ភៈ ។ នៅក្នុងការបង្ហោះនោះបានរៀបរាប់ពីការមិនអើពើរបស់សហគមន៍អន្តរជាតិ ស្របពេលដែលមានជំនួយជាបន្តបន្ទាប់ទៅកាន់តំបន់រងគ្រោះ ។

ជាចុងក្រោយសន្និសីទសារព័ត៌មាន Trust in News បានបញ្ជាក់ថា ការលុបបំបាត់ព័ត៌មានមិនពិត និងផ្សាយព័ត៌មានពិត គឺជាសារៈសំខាន់ និងជាវិជ្ជាជីវៈសម្រាប់អ្នកសារព័ត៌មាន ជាពិសេសវាជាការផ្ដល់ទំនុកចិត្ត និងភាពជឿជាក់ពីសំណាក់ប្រិយមិត្តអ្នកគាំទ្រ ៕