ព័ត៌មានអន្ដរជាតិ

រដ្ឋមន្ត្រីការបរទេស រុស្ស៊ី និងចិន ជួបពិភាក្សាគ្នាអំពីសង្គ្រាមនៅ អ៊ុយក្រែន

បានផុស

១១ ខែ មុន

នៅ

ថ្ងៃសុក្រ ១៤ មេសា ២០២៣

ដោយ

រដ្ឋមន្ត្រីការបរទេសរុស្ស៊ីលោក Sergey Lavrov និងរដ្ឋមន្ត្រីការបរទេសចិនលោក Qin Gang បានជួបប្រជុំគ្នានៅទីក្រុង Samarkand ប្រទេសអ៊ូសបេគីស្ថាន ដើម្បីពិភាក្សាអំពីសង្គ្រាមនៅអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅដើមជំនួបនោះ លោក Lavrov បានលើកឡើងអំពីជំនួបកំពូលរវាងប្រធានាធិបតីរុស្ស៊ី លោក Vladimir Putin និងប្រធានាធិបតីចិន Xi Jinping ដែលបានប្រារព្ធធ្វើនៅទីក្រុងតែមួយកាលពីខែកញ្ញា ។ លោកបន្តថា ដោយសារស្ថានភាពបច្ចុប្បន្នចាំបាច់ត្រូវមានការជួបគ្នាញឹកញាប់ ទើបភាគីទាំងពីរអាចប្រៀបធៀបស្ថានការណ៍បាន ។

លោក Lavrov បាននិយាយថា ដំណើរទស្សនកិច្ចរបស់លោក Xi ទៅកាន់ប្រទេសរុស្ស៊ីកាលពីខែមុន បានក្លាយជាការបញ្ជាក់មួយផ្សេងទៀតអំពីសក្តានុពលរបស់ប្រទេសនានាក្នុងការធ្វើអន្តរកម្មយុទ្ធសាស្ត្រ និងបង្កើតភាពជាដៃគូដ៏ទូលំទូលាយមួយ ។

ក្រសួងការបរទេសរុស្ស៊ី ក្រោយមកបាននិយាយនៅក្នុងសេចក្តីថ្លែងការណ៍មួយថា អ្នកការទូតទាំងពីរបានផ្លាស់ប្តូរទស្សនៈស្តីពីស្ថានភាពនៅអ៊ុយក្រែន ប៉ុន្តែវាមិនបានបង្ហាញព័ត៌មានលម្អិតអំពីការសន្ទនានោះទេ ។

ក្រសួងបាននិយាយទៀតថា លោក Lavrov និងលោក Qin បានយល់ព្រមបដិសេធការប៉ុនប៉ងរបស់ប្រទេសណាមួយដើម្បីជ្រៀតជ្រែកកិច្ចការផ្ទៃក្នុងរបស់ប្រទេសរបស់ពួកគេ ឬការគំរាមកំហែងដើម្បីអនុវត្តវិធានការឯកតោភាគី ។

ដោយឡែកក្រសួងការបរទេសចិនវិញបាននិយាយថា លោក Qin បានប្រាប់លោក Lavrov ថា មិនមានថ្នាំងងុយដេកសម្រាប់ការដោះស្រាយវិបត្តិនៅអ៊ុយក្រែននោះទេ ហើយភាគីទាំងអស់ត្រូវបង្កើតការជឿទុកចិត្តគ្នាទៅវិញទៅមក និងបង្កើតលក្ខខណ្ឌដែលអាចនាំមកនូវការបញ្ចប់សង្គ្រាម ។

ជាចុងក្រោយលោក Qin បានកត់សម្គាល់ថា ប្រទេសចិនប្តេជ្ញាបន្តដើរតួនាទីស្ថាបនាក្នុងការលើកកម្ពស់ការបន្តការចរចាសន្តិភាព និងការដោះស្រាយនយោបាយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន ប្រាប់មូលហេតុមិនទាន់បើកការវាយលុកទៅ រុស្ស៊ី វិញ