ទោះកំពុងជាប់ដៃធ្វើសង្គ្រាម តែ រុស្ស៊ី ជាប្រទេសផលិតជីរ៉ែលំដាប់ទី ២ លើពិភពលោក បន្ទាប់ពី ចិន

ទោះបីជាកំពុងជាប់ដៃធ្វើសង្គ្រាមជាមួយអ៊ុយក្រែនក៏ដោយ ប៉ុន្តែនៅពេលនេះរុស្ស៊ីបានក្លាយ​ជាប្រទេសផលិតជីរ៉ែធំបំផុតលំដាប់ទី ២ លើពិភពលោក បន្ទាប់ពី​ចិន ។

ប្រធានសមាគមអ្នកផលិតជីរុស្ស៊ី (RFPA) លោក Andrey Guryev បាននិយាយថា ក្នុងរយៈពេល ១០ ឆ្នាំកន្លងមកនេះ រុស្ស៊ីបានបង្កើនការផលិត ៤០ ភាគរយ ពោលរហូតដល់ ៥៥ លានតោននៃជីគ្រប់ប្រភេទ ហើយបានវ៉ាដាច់សហរដ្ឋអាមេរិក និងឥណ្ឌាក្នុងការផលិត ។

មិនតែប៉ុណ្ណោះ​ រុស្ស៊ីក៏គ្រោងផលិតឲ្យបាន ៧០ លានតោននៅក្នុងរយៈពេល​ ៥ ឆ្នាំខាងមុខ ខណៈបច្ចុប្បន្ន​ការនាំចេញ​សរុបរបស់រុស្ស៊ីទៅកាន់ប្រទេសសម្ព័ន្ធមិត្តមានរហូតដល់ ៧០ ភាគរយ ។

កាលពីឆ្នាំ ២០២២ ការផ្គត់ផ្គង់ជីរបស់រុស្ស៊ីទៅកាន់ប្រទេសក្រីក្របំផុតដោយមិនគិតថ្លៃប្រមាណ ២៦២,០០០ តោនត្រូវបានរារាំងនៅក្នុងកំពង់ផែនៃប្រទេសឡាតវី អេស្តូនី បែលហ្សិក និងហូឡង់ ហើយមានជីត្រឹមតែ ២ ម៉ឺនតោនប៉ុណ្ណោះត្រូវបានដឹកជញ្ជូនចេញពីប្រទេសហូឡង់ទៅកាន់ប្រទេសម៉ាឡាវី ។

គួរបញ្ជាក់ថា ក្រៅពីជាប្រទេសផលិតជីលំដាប់ទី២ រុស្ស៊ីក៏ជាអ្នកនាំចេញជីច្រើនជាងគេបំផុតរបស់ពិភពលោកផងដែរ ដោយផ្គត់ផ្គង់ប្រហែល ៣៨ លានតោនក្នុងមួយឆ្នាំ ។ យោងតាមសមាគមជីអន្តរជាតិ នៅដើមឆ្នាំ ២០២២ ការនាំចេញជីរបស់រុស្ស៊ីទៅកាន់ពិភពលោកមានចំនួន ១៥ ភាគរយ បន្ទាប់មកប្រទេសចិនមាន ១៣ ភាគរយ និងកាណាដា ៧ ភាគរយ ៕​

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ ក្រុមហ៊ុនជាង ១ ពាន់បិទអាជីវកម្មរបស់ខ្លួននៅ រុស្ស៊ី