រុស្ស៊ី ជួយសាងសង់រោងចក្រថាមពលនុយក្លេអ៊ែរឲ្យ តួកគី ដែលជាប្រទេស ណាតូ

ប្រធានាធិបតីតួកគីលោក Recep Tayyip Erdogan និងប្រធានាធិបតីរុស្ស៊ី លោក Vladimir Putin បានអបអរសាទរក្នុងពិធីសម្ពោធរោងចក្រថាមពលនុយក្លេអ៊ែរដំបូងបង្អស់ឈ្មោះ Akkuyu នៅភាគខាងត្បូងប្រទេសតួកគី និងជារោងចក្រថាមពលនុយក្លេអ៊ែរដែលជួយសាងសង់ឡើងដោយរុស្ស៊ី ។

ក្នុងនោះ លោក Putin ក៏បានបង្ហាញពីការសាទរចំពោះគម្រោងនៃការចែកចាយឥន្ធនៈនុយក្លេអ៊ែរលើកដំបូងទៅក្នុងរ៉េអាក់ទ័រមួយនេះ ដោយលើកឡើងថា វានឹងនាំមកនូវផលប្រយោជន៍សេដ្ឋកិច្ចទៅវិញទៅមក និងលើកកម្ពស់ភាពជាដៃគូពហុភាគីរវាងប្រទេសទាំងពីរផងដែរ ។

ជាក់ស្តែងលោក Putin កំពុងស្វែងរកការពង្រឹងទំនាក់ទំនងជាមួយតួកគី តាមរយៈកិច្ចសហប្រតិបត្តិការសេដ្ឋកិច្ចក្នុងវិស័យថាមពល និងវិស័យផ្សេងទៀត នៅពេលដែលទំនាក់ទំនងរបស់រុស្ស៊ីជាមួយបណ្តាប្រទេសលោកខាងលិចកំពុងធ្លាក់ចុះ ដោយសារតែសង្គ្រាមលុកលុយលើអ៊ុយក្រែន បើទោះបីជា តួកគីជាប្រទេសនៃសមាជិកអង្គការណាតូក៏ដោយ។

ពាក់ព័ន្ធនឹងបញ្ហានេះដែរ លោក Erdogan បានសង្កត់ធ្ងន់ថា ទីបំផុតតួកគីបានឡើងដល់ក្របខ័ណ្ឌនៃប្រទេសដែលមានថាមពលនុយក្លេអ៊ែរខ្លាំងក្លាយបំផុតមួយនៅក្នុងពិភពលោកហើយ ហើយលោកក៏បាននិយាយផងដែរថា រ៉េអាក់ទ័រទាំង ៤ នៅរោងចក្រនេះ រំពឹងថានឹងដំណើរការនៅឆ្នាំ ២០២៨ ។

គួរបញ្ជាក់ថា នេះគឺជាការបង្ហាញខ្លួនជាសាធារណៈលើកដំបូងរបស់លោក Erdogan ចាប់តាំងពីលោកបានលុបចោលភារកិច្ចផ្លូវការមួយចំនួន ដោយលើកឡើងពីបញ្ហាសុខភាពមិនល្អកាលពីថ្ងៃអង្គារ ស្របពេលដែលប្រទេសតួកគីក៏នឹងរៀបចំការបោះឆ្នោតប្រធានាធិបតីថ្ងៃទី១៤ ខែឧសភាខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ប្រាប់គោលដៅសំខាន់ទើបឈានដល់ផ្ទុះសង្គ្រាមជាមួយ អ៊ុយក្រែន