រុស្ស៊ី ប្រាប់គោលដៅសំខាន់ទើបឈានដល់ផ្ទុះសង្គ្រាមជាមួយ អ៊ុយក្រែន

វិមានក្រឹមឡាំងបាននិយាយកាលពីពេលថ្មីៗនេះថា ការទប់ស្កាត់អ៊ុយក្រែនចូលជាសមាជិករបស់អង្គការណាតូនៅតែជាគោលដៅដ៏សំខាន់មួយនៃ “ប្រតិបត្តិការសឹក” របស់រុស្ស៊ី ដែលរហូតមកដល់ពេលនេះបានអូសបន្លាយពេលដល់ខែទី ១៤ ហើយ ។

អ្នកនាំពាក្យវិមានក្រឹមឡាំង លោក Dmitry Peskov បានអះអាងនៅក្នុងសន្និសីទសារព័ត៌មានមួយថា “ប្រសិនបើអ៊ុយក្រែនចូលជាសមាជិកអង្គការណាតូ នោះវានឹងបង្កការគំរាមកំហែងយ៉ាងធ្ងន់ធ្ងរដល់សន្តិសុខនៃប្រទេសរបស់យើង” ។

ទន្ទឹមនោះ ការព្រមានរបស់វិមានក្រឹមឡាំងបានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រមុខអង្គការណាតូលោក Jens Stoltenberg បានអញ្ជើញទៅទីក្រុងកៀវក្នុងដំណើរទស្សនកិច្ចដែលមិនមានការប្រកាសឲ្យដឹងកាលពីថ្ងៃទី២០ ខែមេសា ។

ស្របពេលជាមួយគ្នានេះ ដំណើរ​ទស្សនកិច្ចរបស់លោក Stoltenberg ​ទៅកាន់ប្រទេសអ៊ុយក្រែន ក៏ជាលើកដំបូងរបស់ប្រមុខអង្គការណាតូរូបនេះផងដែរ ចាប់​តាំងពីផ្ទុះសង្គ្រាម​រុស្ស៊ី-​អ៊ុយក្រែន​កាល​ពី​ខែ​កុម្ភៈ ឆ្នាំ ២០២២ មក ។

គួរបញ្ជាក់ថា រដ្ឋាភិបាលទីក្រុងកៀវបានដាក់ពាក្យសុំចូលជាសមាជិកអង្គការណាតូកាលពីខែកញ្ញា ឆ្នាំ២០២២ ខណៈរហូតមកដល់ពេលនេះ មិនទាន់មានការឯកភាព ឬទទួលយកអ៊ុយក្រែនចូលជាសមាជិកភាពផ្លូវការនៅឡើយទេ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ុយក្រែន ឲ្យសម្ព័ន្ធមិត្តឆ្លងកាត់ “បន្ទាត់ក្រហម” ក្នុងបញ្ហាផ្គត់ផ្គង់អាវុធ