ឧទ្ធម្ភាគចក្រយោធាអាមេរិកពីរគ្រឿង ធ្លាក់នៅរដ្ឋអាឡាស្កា

ឧទ្ធម្ភាគចក្រ AH-64 Apache របស់កងទ័ពអាមេរិកចំនួនពីរគ្រឿង បានធ្លាក់ក្នុងរដ្ឋអាឡាស្កា បន្ទាប់ពីបេសកកម្មហ្វឹកហាត់។ ឧទ្ធម្ភាគចក្រនីមួយៗ មានដឹកទាហានពីរនាក់ ខណៈការស៊ើបអង្កេតត្រូវបានធ្វើឡើងដើម្បីរកមូលហេតុនៃឧប្បត្តិហេតុនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧទ្ធម្ភាគចក្រទាំងពីរ បានធ្លាក់នៅជិតទីក្រុង Healy ភាគកណ្តាលរដ្ឋអាឡាស្កា កាលពីថ្ងៃព្រហស្បតិ៍ទី២៧ខែមេសា (ត្រូវនឹងថ្ងៃសុក្រនៅកម្ពុជា)។ នេះបើយោងតាមការបញ្ជាក់ពី កងពលធំលេខ១១របស់យោធាសហរដ្ឋអាមេរិក។

កងពលនេះ បានបង្ហោះ Twitter ថា “អ្នកឆ្លើយតបដំបូងបានទៅដល់កន្លែងកើតហេតុ។ ឧបទ្ទវហេតុនេះកំពុងស្ថិតក្រោមការស៊ើបអង្កេត ហើយព័ត៌មានបន្ថែម នឹងត្រូវបញ្ចេញនៅពេលក្រោយ”។

ក្រោយមក អ្នកនាំពាក្យយោធាលោក John Pennell ក៏បានអះអាងផងដែរថា មានមនុស្សសរុប៤នាក់នៅក្នុងឧទ្ធម្ភាគចក្រនេះ ប៉ុន្តែលោកមិនបានផ្តល់ព័ត៌មានលម្អិតលើសនេះទេ។ យ៉ាងណា ប្រភពមួយលើកឡើងថា ទាហាន៣នាក់ បានបាត់បង់ជីវិត។

គួរបញ្ជាក់ថា ឧបទ្ទវហេតុនេះមិនមែនជាលើកទីមួយឡើយដែលជាប់ពាក់ព័ន្ធនឹងឧទ្ធម្ភាគចក្រ Apache ក្នុងឆ្នាំ២០២៣។ កាលពីខែកុម្ភៈ ទាហាន២នាក់មកពីកងវរសេនាតូចវាយប្រហារលេខ២៥ បានរងរបួសក្នុងហេតុការណ៍ធ្លាក់ឧទ្ធម្ភាគចក្រនៅរដ្ឋអាឡាស្កាដដែលនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ វីដេអូ ថតជាប់ ឧទ្ធម្ភាគចក្រ ២គ្រឿងហោះទៅបុកគ្នានៅ អូស្រ្តាលី សម្លាប់មនុស្សច្រើននាក់