កសិករពង្រីកផ្ទៃដីដាំដុះ ខណៈតម្លៃស្រូវនៅ អាស៊ី កើនឡើងខ្ពស់

នៅក្នុងឆ្នាំនេះទិន្នផលស្រូវរបស់អាស៊ីនឹងកើនឡើង ដោយសារតម្លៃកាន់តែខ្ពស់ជំរុញកសិករឲ្យពង្រីកផ្ទៃដីដាំដុះ និងប្រើប្រាស់ជីកាន់តែច្រើន ដើម្បីបំពេញតម្រូវការផ្គត់ផ្កង់ បន្ទាប់ពី​ឆ្នាំមុនទិន្នផលមានការធ្លាក់ចុះជាលើកដំបូង​ក្នុងរយៈពេល ៧ ឆ្នាំ​មកនេះ ។

សម្រាប់ការប្រមូលផលស្រូវនាពេលថ្មីៗនេះ ឥណ្ឌា និងថៃដែលជាប្រទេសនាំចេញកំពូលរបស់ពិភពលោក បានកើនលើសកម្រិតកាលពីឆ្នាំមុន ហើយកសិករកំពុងត្រៀមលក្ខណៈសម្រាប់ដាំដំណាំសំខាន់ៗនៅរដូវដាំដុះខាងមុខនេះ ។

សេដ្ឋវិទូនៃអង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) គឺលោកស្រី Shirley Mustafa បាននិយាយថា ប្រទេសកសិកម្មសំខាន់ៗ រួមទាំង ឥណ្ឌា ប៉ាគីស្ថាន និងថៃ នឹងចាប់ផ្តើមដាំដុះនៅក្នុងខែឧសភា​នេះ និងខែមិថុនា ។

លោកស្រី​បន្តថា ​ផ្ទៃដី​ធំ​ជាង​នេះ​នឹង​ត្រូវ​បាន​ដាំ​​ស្រូវដើម្បី​ឆ្លើយតប​នឹង​ការ​កើនឡើង​នៃ​តម្លៃ​ស្រូវ ហើយ​ការ​ទទួល​បាន​ជី​កាន់តែ​ច្រើន ​អាច​ទ្រទ្រង់​ការ​ពង្រីក​ទិន្នផល​ពី​ដំណាំ​ទាំងនេះផងដែរ ។​

តាមរយៈអង្គការ FAO ទិន្នផលពីដំណាំខុសរដូវក្នុងប្រទេសថៃនៅឆ្នាំនេះត្រូវបានរំពឹងថា នឹងកើនដល់ ៥.១ លានតោន ដោយកើនឡើង ២៤ ភាគរយ បើធៀបនឹងឆ្នាំមុន ។

ទន្ទឹមនេះ ផលិតកម្ម​ស្រូវ​រដូវ​រងា​ក្នុង​ប្រទេស​ឥណ្ឌា​បាន​កើនឡើង​ដល់​ ២២.៨ ​លាន​តោន​ពី​ ១៨.៥ ​លាន​តោន​កាលពី​ឆ្នាំ​មុន ដោយសារ​ទឹកភ្លៀង​លើស​កម្រិត​មធ្យម​ក្នុង​ខែកញ្ញា​ដល់​ខែតុលា​ ដែលធ្វើឲ្យកសិករពង្រីកផ្ទៃដីដាំដុះច្រើន ។

ដោយឡែក ចំពោះតម្លៃ​ជីនៅក្នុងត្រីមាសទី១​ នៃឆ្នាំនេះវិញ ក៏បង្ហាញសញ្ញាល្អផងដែរ ពោលតម្លៃបានធ្លាក់ចុះ ដោយសារការផ្គត់ផ្គង់ពីប្រទេសបេឡារុស ដែលជាអ្នកនាំចេញប៉ូតាស្យូមធំជាងគេទី ៣ បានចាប់ផ្តើមឡើងវិញ ៕

ប្រែសម្រួល៖ នាង រតនៈ

ប្រភព៖ China Daily

ចុចអាន ៖ ស្រ្តីរកស៊ីផ្លូវភេទ ថៃ សង្ឃឹមការបោះឆ្នោតខាងមុខ​នឹងផ្លាស់ប្តូរជីវភាព​រស់នៅរបស់ពួកគេ