ទេសចរបរទេស សម្រុកចេញពីភាគខាងជើងប្រទេសវៀតណាម ដោយសារដាច់ចរន្តអគ្គិសនី

ភ្ញៀវទេសចរបរទេសជាច្រើនដែលសម្រុកទៅតំបន់ភាគខាងជើងប្រទេសវៀតណាម ដើម្បីលំហែកាយនៅថ្ងៃឈប់សម្រាករដូវក្តៅ បានផ្លាស់ប្តូរគោលដៅរបស់ពួកគេ ឬត្រលប់មកផ្ទះវិញ ដោយសារតែការដាច់ចរន្តអគ្គិសនីទ្រង់ទ្រាយធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមអ្នកទេសចរទាំងនោះ មានជនជាតិសិង្ហបុរីម្នាក់ ឈ្មោះ Weichao អាយុ៣២ឆ្នាំបានទៅលេងទីក្រុង Ha Long ជាមួយមិត្តភក្តិកាលពីដើមខែមិថុនា ប៉ុន្តែពួកគេត្រូវជួបប្រទះនឹងការដាច់ចរន្តអគ្គិសនីនៅយប់ដំបូងនៃដំណើរកម្សាន្តនោះទៅវិញ។

ហើយនៅយប់បន្ទាប់ អគ្គិសនីក៏ដាច់ទៀត ជាហេតុនាំឲ្យពួកគេត្រូវសម្រាកនៅលើកម្រាលហើយបក់ផ្លិត ទាល់ភ្លឺ។ គាត់និយាយថា “យើងមិនអាចទ្រាំនៅក្នុងសណ្ឋាគារបានទេ ព្រោះវាក្តៅពេក”។

ក្រោយមក Weichao ទើបដឹងថា ការដាច់ចរន្តអគ្គិសនី នឹងបន្តក្នុងរយៈពេលប៉ុន្មានថ្ងៃខាងមុខនេះ។ ដូច្នេះ​គាត់​និង​មិត្តភ័ក្តិ ​បានសម្រេចចិត្តបញ្ចប់ដំណើរកម្សាន្ត ​ហើយ​ត្រលប់​មក​ផ្ទះ​វិញ។

ក្រៅពី Weichao មានភ្ញៀវទេសចរបរទេសជាច្រើននាក់ទៀត ដែលបានប្រាប់រឿងរ៉ាវស្រដៀងគ្នានេះ។

ផ្នែកជាច្រើននៃទីក្រុង Ha Long ដែលល្បីថាមានឆ្នេរសមុទ្រស្រស់ស្អាត បាននិងកំពុងជួបប្រទះជាមួយការដាច់ចរន្តអគ្គិសនី ក្នុងរយៈពេលប៉ុន្មានថ្ងៃកន្លងមកនេះ ដោយធ្វើប៉ះពាល់ធ្ងន់ធ្ងរដល់ឧស្សាហកម្មទេសចរណ៍ ក្នុងរដូវក្តៅ។

គិតត្រឹមពាក់កណ្តាលឆ្នាំ២០២៣ ប្រទេសវៀតណាម ទទួលបានភ្ញៀវទេសចរអន្តរជាតិចំនួន ៤.៦លាននាក់ ពោលគឺស្មើនឹងប្រមាណ៦០% នៃគោលដៅ៨លាននាក់របស់ខ្លួន។

គួរបញ្ជាក់ថា ដោយសារឥទ្ធិពលនៃគំរូអាកាសធាតុ El Nino, ភាគខាងជើងប្រទេសវៀតណាមមានភ្លៀងធ្លាក់តិច និងរលកកម្តៅកាន់តែខ្លាំង ដោយពេលខ្លះសីតុណ្ហភាពកើនឡើងដល់៤០អង្សាសេឯណោះ៕

ប្រែសម្រួល៖ Vann Vann

ប្រភព៖ VN Express

ចុចអាន៖ វៀតណាម បិទរោងចក្រ វារី អគ្គិសនី ចំនួន ១១ ដោយសារ ខ្វះទឹក