ដើម្បីឪពុក កូនប្រុសមហាសេដ្ឋីប៉ាគីស្ថាន បែរជាត្រូវស្លាប់ក្នុងយាន Titan

ឆ្មាំសមុទ្រអាមេរិក បានរកឃើញបំណែកនៃយានជ្រមុជទឹក Titan នៅជិតខ្មោចកប៉ាល់ Titanic ហើយបញ្ជាក់ជាផ្លូវការថា អ្នកដំណើរ ៥ នាក់ បានស្លាប់អស់ហើយ ដោយសារការផ្ទុះដ៏មហន្តរាយ ។

នៅក្នុងចំណោមជនរងគ្រោះចំនួន ៥ នាក់ ដែលបាត់បង់ជីវិតក្នុងហេតុការណ៍នោះ មានមនុស្ស ២ នាក់ ជាឪពុកកូនបង្កើតនឹងគ្នា គឺបុរសជាឪពុកមានឈ្មោះថា Shahzada Dawood ជាមហាសេដ្ឋីប៉ាគីស្ថាន ហើយកូនប្រុសរបស់គាត់មានឈ្មោះថា Suleman មានវ័យត្រឹម ១៩ ឆ្នាំប៉ុណ្ណោះ ។

បើយោងតាមអ្នកស្រី Azmeh Dawood ប្អូនស្រី​បង្កើតរបស់លោក Shahzada Dawoo បានឲ្យដឹងថា តាមការពិតក្មួយប្រុសរបស់គាត់មិនចង់ជិះយានជ្រមុជទឹកនេះនោះទេ ហើយអ្វីដែលជំរុញឲ្យរូបគេសម្រេចចិត្តទៅមើលកប៉ាល់ Titanic នោះគឺដើម្បីផ្គាប់ចិត្តឪពុកក្នុងថ្ងៃ “ទិវាលោកឪពុក” ជាពិសេសតែម្ដង ។

គួរបន្ថែមថា Suleman ជានិស្សិតរៀននៅសាកលវិទ្យាល័យ Strathclyde នៃទីក្រុង Glasgow ប្រទេសស្កុតឡែន ហើយរូបគេចូលចិត្តអក្សរសិល្ប៍ប្រឌិតបែបវិទ្យាសាស្ត្រ ការសិក្សារឿងថ្មីៗ លេងគូប និងបាល់ទះជាដើម ៕

ប្រែសម្រួល៖ វារី

ប្រភព៖ dailymail

ចុចអាន៖ មកស្គាល់មហាសេដ្ឋីប៉ាគីស្ថាន និងកូនប្រុស ដែលស្លាប់ក្នុងយានជ្រមុជទឹក Titan