ស្ត្រីដាច់ជើងនៅជណ្ដើរយន្តអាកាសយានដ្ឋានប្រទេសថៃ កំពុងដាក់ពាក្យបណ្ដឹង

គ្រួសារស្ត្រីរងគ្រោះដែលដាច់ជើងឆ្វេង ដោយសារជាប់ជណ្ដើរយន្តនៅអាកាសយានដ្ឋានដនមឿង ប្រទេសថៃ កាលពីថ្ងៃព្រហស្បតិ៍សប្ដាហ៍មុន នឹងដាក់ពាក្យបណ្ដឹងទៅប៉ូលិស ។

លោក Krit Kittirattana កូនប្រុសជនរងគ្រោះបានបង្ហោះក្នុង Facebook កាលពីថ្ងៃអង្គារ ទី០៤ ខែកក្កដាថា ស្ថានភាពម្ដាយរបស់ខ្លួនគឺនឹងនធម្មតា ហើយកំពុងទទួលការព្យាបាលនៅបន្ទប់ ICU ។

លោក Krit បានឲ្យដឹងទៀតថា ម្ដាយគាត់មានអារម្មណ៍ល្អទេ និងចាប់ផ្ដើមអនុញ្ញាតឲ្យគេចូលមកសួរសុខទុក្ខហើយ ប៉ុន្តែជួនកាលនៅតែងើបកណ្ដាលយប់ ដោយភាពភ័យខ្លាចដដែល ។ យ៉ាងណាមិញ ស្ត្រីរងគ្រោះកំពុងទទួលការព្យាបាលទាំងផ្លូវកាយ និងផ្លូវចិត្តក្នុងមន្ទីរពេទ្យអន្តរជាតិ Bumrungrad ។

ជុំវិញគ្រោះថ្នាក់ខាងលើ លោក Krit បានបញ្ជាក់ថា ក្រុមគ្រួសារបាន​​ឲ្យ​មេធាវី​ដាក់​ពាក្យ​បណ្តឹង​ទៅ​ប៉ូលិស​ហើយ និង​ទាក់ទង​ទៅ​សមត្ថកិច្ច​ស៊ើបអង្កេត​ ដើម្បី​ឲ្យ​ពួកគេ​សាកសួរ​ម្តាយ​គាត់​ផ្ទាល់តែម្ដង ហើយក្រៅពីនេះ ក្រុមគ្រួសារជនរងគ្រោះកំពុងស្វែងរកសាក្សីនៅកន្លែងកើតហេតុ ដើម្បីបំភ្លឺនៅក្នុងតុលាការផងដែរ ។

ពាក់ព័ន្ធនឹងបញ្ហានេះដែរ ស្នងការប៉ូលិសដនមឿង លោក Adirek Tongkeamkeaw បាននិយាយថា ប៉ូលិសកំពុងពិនិត្យមើលវីដេអូកាមេរ៉ាសុវត្ថិភាពនៅអាកាសយានដ្ឋាន ហើយក៏កំពុងត្រួតពិនិត្យផ្លូវដើរផ្សេងៗទៀតនៅក្នុងបរិវេណនោះផងដែរ ដើម្បីធានាសុវត្ថិភាពដល់អ្នកដំណើរក្រោយៗ ៕

ប្រែសម្រួល៖ វារី

ប្រភព៖ Bangkok Post

ចុចអាន៖ នេះជាមូលហេតុ ស្ត្រីម្នាក់ជាប់ជណ្ដើរយន្ត ដាច់ជើងនៅព្រលានដនមឿង