លោក ថាក់ស៊ីន ពន្យារពេលចូលស្រុក រហូតដល់ស្ថានការណ៍នយោបាយ ថៃ ស្ងប់ស្ងាត់សិន

លោកស្រី ផេថងថាន ស៊ីណាវ៉ាត់ត្រា បាននិយាយកាលពីថ្ងៃពុធថា អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា បានសម្រេចចិត្តមិនត្រឡប់ចូលស្រុកវិញ ដោយសារតែលោកមិនចង់បង្កជម្លោះនយោបាយនោះឡើយ ។

កូនស្រីពៅរបស់លោក ថាក់ស៊ីន ដែលជាបេក្ខភាពនាយករដ្ឋមន្ត្រីរបស់គណបក្សភឿថៃ បានលើកឡើងទៀតថា ការពន្យារពេលវិលត្រឡប់ចូលស្រុករបស់ឪពុកលោកស្រីនឹងមិនយូរទៀតនោះទេ បន្ទាប់ពីលោកប្រកាសផែនការមកថៃវិញនៅដើមខែកក្កដា ដោយសារតែលោក​កំពុង​រង់ចាំ​ស្ថានការណ៍​នយោបាយនៅក្នុងប្រទេស ​ដោះស្រាយឲ្យរួចរាល់ជា​មុន​សិន ។

លោក​ស្រី​បាន​និយាយ​ថា “ទោះ​បី​ជា​ឪពុក​របស់​ខ្ញុំ​បាន​ប្រាប់​សារព័ត៌មាន​ពីការ​វិល​ត្រឡប់​មក​ផ្ទះ​របស់​គាត់ ​មិន​មានជាប់​ពាក់ព័ន្ធ​នឹង​រឿង​នយោបាយ​ក៏​ដោយ ក៏​ប្រជាពលរដ្ឋជា​ច្រើន​ជឿជាក់​ថា រឿងទាំងពីរនេះគឺមានទំនាក់ទំនងនឹងគ្នា ហើយទោះបីជាលោក ថាក់ស៊ីន ចង់វិលមកដោះស្រាយបញ្ហានយោបាយក៏ដោយ ក៏មិនមានជាប់ពាក់ព័ន្ធជាមួយប្រទេសថៃក្នុងការទទួលបានរដ្ឋាភិបាលថ្មីនោះដែរ” ។

ទោះជាយ៉ាងណា ស្ថានភាពនយោបាយបច្ចុប្បន្នក្នុងប្រទេសថៃ គឺជាមូលហេតុចម្បងនៃការពន្យារពេលចូលស្រុករបស់លោក ថាក់ស៊ីន ខណៈពាក់ព័ន្ធនឹងបញ្ហានេះ លោកស្រី ផេថងថាន ក៏បានអះអាងដែរថា ឪពុករបស់លោកស្រីអាចត្រឡប់មកថៃវិញ លុះត្រាតែនយោបាយក្នុងប្រទេសដំណើរការដោយរលូនជាមុនសិន ។

គួរបញ្ជាក់ថា បន្ទាប់ពីរដ្ឋាភិបាលរបស់លោក ថាក់ស៊ីន ត្រូវបានបណ្តេញចេញ ដោយសារតែរដ្ឋប្រហារយោធានៅថ្ងៃទី១៩ ខែកញ្ញា ឆ្នាំ ២០០៦ អតីតនាយករដ្ឋមន្ត្រីដែលបច្ចុប្បន្នមានវ័យ ៧៣ ឆ្នាំរូបនេះបានភៀសខ្លួនចេញពីប្រទេសក្នុងឆ្នាំ ២០០៨ ដើម្បីគេចពីការជាប់ពន្ធនាគារ បន្ទាប់ពីរកឃើញមានទោសកំហុសក្នុងករណីពុករលួយចំនួន ៤ និងត្រូវកាត់ទោសឲ្យជាប់ពន្ធនាគារសរុបចំនួន ១២ ឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោក ប្រាយុទ្ធ ទុកបំណងចំនួន ៣ ដល់បក្ស ថៃ រួបរួមជាតិ ក្រោយឈប់ ប្រឡូកក្នុងឆាកនយោបាយ