ព័ត៌មានអន្ដរជាតិ

លោក ប្រាយុទ្ធ ទុកបំណងចំនួន ៣ ដល់បក្សថៃរួបរួមជាតិ ក្រោយឈប់ប្រឡូកក្នុងឆាកនយោបាយ

បានផុស

៣ years មុន

នៅ

ថ្ងៃពុធ ១២ កក្កដា ២០២៣

ដោយ

នាយករដ្ឋមន្ត្រីផុតអាណត្តិរបស់ថៃលោក ប្រាយុទ្ធ ចាន់អូចា ដែលបានប្រកាសចូលនិវត្តន៍ពីឆាកនយោបាយ ហើយនឹងលាលែងពីតំណែងជាសមាជិកគណបក្សថៃរួបរួមជាតិផងនោះ បានសម្ដែងនូវបំណងប្រាថ្នាចំនួន ៣ ដល់គណបក្សឲ្យបន្តអនុវត្ត ក្រោយពីលោកចាកចេញទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍របស់លោក ប្រាយុទ្ធ ដែលត្រូវបានបង្ហោះនៅលើទំព័រហ្វេសប៊ុករបស់គណបក្សថៃរួបរួមជាតិ បានឲ្យដឹងថា បំណងចំនួន ៣ ដែលលោក ប្រាយុទ្ធ ចង់ឲ្យថ្នាក់ដឹកនាំ និងសមាជិកក្រុមប្រឹក្សាប្រតិបត្តិ ក៏ដូចជាសមាជិកបក្សអនុវត្តនោះគឺ បន្តសកម្មភាពនយោបាយដោយមនោគមវិជ្ជារឹងមាំ ការពារស្ថាប័នរដ្ឋ និងថែរក្សាប្រជាជនថៃ ។

ស្របពេលជាមួយគ្នានេះ លោកក៏បានស្នើឲ្យប្រជាពលរដ្ឋបន្តគាំទ្រការងាររបស់គណបក្សថៃរួបរួមជាតិ និងថ្លែងអំណរគុណចំពោះប្រជាពលរដ្ឋដែលបានគាំទ្រគណបក្ស និងរូបលោក ក្នុងការបោះឆ្នោតសកលកាលពីខែឧសភាកន្លងមកផងដែរ ។

អតីតមេទ័ពវ័យ ៦៩ ឆ្នាំរូបនេះបានលើកឡើងទៀតថា ក្នុងរយៈពេល ៩ ឆ្នាំជានាយករដ្ឋមន្ត្រី លោកបានខិតខំប្រឹងប្រែងអស់ពីសមត្ថភាព ដើម្បីនាំមកនូវភាពរីកចម្រើនដល់ប្រទេស និងសាធារណៈជន ។

ទន្ទឹមនោះ សេចក្តីប្រកាសឈប់ប្រឡូកក្នុងឆាកនយោបាយរបស់លោក ប្រាយុទ្ធ ធ្វើឡើង នៅពេលដែលសភាថ្មីនឹងកោះប្រជុំនៅថ្ងៃព្រហស្បតិ៍ ទី១៣ ខែកក្កដា ដើម្បីបោះឆ្នោតជ្រើសរើសបេក្ខភាពរូបណានឹងក្លាយជានាយករដ្ឋមន្ត្រីបន្ទាប់របស់ថៃ ប៉ុន្តែទោះជាយ៉ាងណា លោកនឹងនៅតែជានាយករដ្ឋមន្ត្រីចាំផ្ទះរហូតដល់រដ្ឋាភិបាលថ្មីត្រូវបានបង្កើតឡើង ។

គួរបញ្ជាក់ថា គណបក្សថៃរួបរួមជាតិរបស់លោក ប្រាយុទ្ធ បានចាញ់ការបោះឆ្នោតកាលពីថ្ងៃទី១៤ ខែឧសភា ដែលនៅក្នុងនោះគណបក្សនេះទទួលបានសំឡេងត្រឹមតែ ៣៦ អាសនៈប៉ុណ្ណោះក្នុងចំណោម ៥០០ អាសនៈសភា ខណៈគណបក្សឈ្នះឆ្នោតគឺ បក្សចលនាឆ្ពោះទៅមុខ ទទួលបានសំឡេង ១៥១ អាសនៈ ៕