ប្រជាជន ថៃ ប្រមូលផ្ដុំគ្នានៅ បាងកក ដើម្បីធ្វើបាតុកម្មទ្រង់ទ្រាយធំគាំទ្រ​លោក Pita

ក្រុមបាតុករថៃដែលគាំទ្រមេដឹកនាំគណបក្សចលនាឆ្ពោះទៅមុខ លោក Pita Limjaroenrat ជានាយករដ្ឋមន្ត្រីទី ៣០ របស់ប្រទេស បានប្រមូលផ្ដុំគ្នាទ្រង់ទ្រាយធំនៅកន្លែងជាច្រើនក្នុងទីក្រុងបាងកកដើម្បីត្រៀមធ្វើបាតុកម្មក្នុងថ្ងៃចុងសប្តាហ៍នេះ ។

ការប្រមូលផ្ដុំរបស់ក្រុមបាតុករបានកើតឡើង បន្ទាប់ពីសភាបានបោះឆ្នោតដកសិទ្ធិឈរឈ្មោះលើកទី ២ របស់លោក Pita សម្រាប់តំណែងនាយករដ្ឋមន្ត្រី ក៏ដូចជាការសម្រេចចិត្តរបស់តុលាការធម្មនុញ្ញក្នុងការដកបញ្ឈរជើង មេដឹកនាំគណបក្សចលនាឆ្ពោះទៅមុខរូបនេះ ជាសមាជិកសភា ពាក់ព័ន្ធទៅនឹងសំណុំរឿងកាន់កាប់ភាគហ៊ុនប្រព័ន្ធផ្សព្វផ្សាយ iTV ។

ទន្ទឹមនោះ ក្រុមប្រឹក្សានិស្សិតនៃសាកលវិទ្យាល័យ Thammasat, ក្រុមបាតុកម្ម Talugas និងអង្គការនិស្សិតនៃប្រទេសថៃបានបង្ហោះនៅលើទំព័រ Facebook ថា ពួកគេក៏នឹងបន្តរៀបចំផែនការធ្វើបាតុកម្មរហូតដល់ថ្ងៃអាទិត្យផងដែរ ។

ស្របពេលជាមួយគ្នានេះ ការប្រមូលផ្ដុំដែលបានគ្រោងទុកកាលពីថ្ងៃសុក្របានចាប់ផ្តើមនៅខាងក្រៅសាលប្រជុំរបស់សាកលវិទ្យាល័យ Kasetsart កាលពីវេលាម៉ោង ៥ ល្ងាច ខណៈនៅម៉ោង ៧ យប់ក្រុមបាតុករបានប្រមូលផ្ដុំនៅខាងក្រៅមជ្ឈមណ្ឌលសិល្បៈ និងវប្បធម៌ទីក្រុងបាងកក (BACC) ។

ពាក់ព័ន្ធនឹងបញ្ហានេះ លោក Sombat Boonngam-anong សកម្មជននយោបាយមួយរូបក៏បានបង្ហោះនៅលើទំព័រ Facebook របស់លោកដែរថា លោកសូមអំពាវនាវឲ្យបន្តមានការប្រមូលផ្ដុំទ្រង់ទ្រាយធំមួយផ្សេងទៀតនាថ្ងៃអាទិត្យនៅផ្លូវបំបែក Asok ចាប់ពីម៉ោង ៥ ល្ងាចដើម្បីបង្ហាញពីការគាំទ្រចំពោះលោក Pita និងគណបក្សចលនាឆ្ពោះទៅមុខ ហើយលោកក៏នឹង​អញ្ជើញ​លោក Pita ឲ្យមក​ចូលរួមផងដែរ ។

គួរបញ្ជាក់ថា អាជ្ញាធរក្នុងទីក្រុងបាងកកកាលពីថ្ងៃសុក្រក៏បានជូនដំណឹងដល់អ្នកបើកបររថយន្តទាំងអស់ឲ្យបញ្ចៀសការធ្វើចរាចរណ៍លើផ្លូវមួយចំនួននៅតំបន់ជុំវិញមជ្ឈមណ្ឌលសិល្បៈ និងវប្បធម៌ទីក្រុងបាងកក ក៏ដូចជាផ្លូវបំបែក Pathumwan ខណៈដែលក្រុមអ្នកតវ៉ាបានរៀបចំធ្វើបាតុកម្មនៅទីនោះ ចាប់ពីម៉ោង ៤ រសៀលរហូតដល់ម៉ោង ៧ យប់ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ លោក Pita ចេញមុខនិយាយទៅកាន់ប្រជាជន ថៃ ក្រោយអស់សិទ្ធិធ្វើជា​នាយករដ្ឋមន្ត្រី