រុស្ស៊ី គំរាមវាយប្រហារសងសឹក លើទីតាំងដែលគ្មានអ្នកណានឹកស្មានដល់ នៅអ៊ុយក្រែន

ប៉ុន្មានម៉ោងបន្ទាប់ពីយន្តហោះគ្មានមនុស្សបើករបស់អ៊ុយក្រែន ព្យាយាមវាយប្រហារគោលដៅនៅទីក្រុងមូស្គូនិងគ្រីមៀ  អតីតប្រធានាធិបតីរុស្ស៊ី លោក Dmitry Medvedev អះអាងថា ប្រទេសអ៊ុយក្រែនកំពុងធ្វើការវាយប្រហារលើគោលដៅជនស៊ីវិលនៅក្នុងប្រទេសរុស្ស៊ី ដើម្បីបង្វែរការយកចិត្តទុកដាក់ពីការវាយបកដ៏អភ័ព្វរបស់ខ្លួន ហើយលោកថែមទាំងគំរាមផងដែរថា ការសងសឹករបស់រុស្ស៊ី នឹងគ្មាននរណាម្នាក់នឹកស្មានដល់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា ទីក្រុងមូស្គូ គួរតែជ្រើសរើសគោលដៅដែលមិនមានលក្ខណៈស្តង់ដារសម្រាប់ការវាយប្រហារសងសឹករបស់ខ្លួន ជាការឆ្លើយតបទៅនឹងការវាយប្រហាររបស់ទីក្រុងកៀវលើទីតាំងស៊ីវិល។

លោកសរសេរលើ Telegram ថា “សត្រូវរបស់យើង មិនអាចសម្រេចបានជោគជ័យក្នុងដំណើរការវាយលុករបស់ខ្លួនបានទេ ដែលនេះមានន័យថា ពួកគេនឹងស្វែងរកជ័យជម្នះក្នុងវិស័យសារព័ត៌មាន ទោះបីជាហួសហេតុ និងមិនសមហេតុផលក៏ដោយ។ ពួកគេកំពុងជ្រើសរើសគោលដៅស៊ីវិល សម្រាប់ការវាយប្រហារដ៏គួរឲ្យស្អប់ខ្ពើម ហើយមនុស្សគ្រប់គ្នាត្រូវតែត្រៀមខ្លួនសម្រាប់រឿងនេះ”។

លោកបន្ថែម “ដូចនេះ យើងក៏ត្រូវជ្រើសរើសគោលដៅដែលមិនមានលក្ខណៈស្តង់ដារសម្រាប់ការវាយប្រហាររបស់យើងដែរ ពោលគឺមិនត្រឹមតែឃ្លាំង មជ្ឈមណ្ឌលថាមពល និងមូលដ្ឋានប្រេងប៉ុណ្ណោះទេ ប៉ុន្តែនៅមានកន្លែងផ្សេងទៀតដែលគ្មាននរណាម្នាក់នឹកស្មានដល់ ហើយកន្លែងដែលវាយប្រហារនោះនឹងមានឥទ្ធិពលធំធេង”។

គួរបញ្ជាក់ជាថ្មី ការគំរាម​របស់​លោក Medvedev ​ធ្វើ​ឡើង​បន្ទាប់​ពី​ការ​ប៉ុនប៉ង​វាយ​ប្រហារ​ដោយ​យន្តហោះដ្រូន​របស់​អ៊ុយក្រែន​ ​លើ​ទីក្រុង​មូស្គូ​កាល​ពី​ព្រឹក​ថ្ងៃ​ចន្ទទី២៤ខែកក្កដា។ ឧបទ្ទវហេតុនេះពាក់ព័ន្ធនឹងដ្រូន២គ្រឿង ប៉ុន្តែត្រូវបានរុស្ស៊ីស្ទាក់ចាប់ ហើយធ្លាក់ចូលទៅក្នុងអគារមួយកន្លែង ខណៈក្រុមមន្ត្រីនិយាយថា ការវាយប្រហារនោះ មិនបណ្តាលឲ្យមានអ្នករបួស ឬការខូចខាតអ្វីធ្ងន់ធ្ងរនោះទេ ៕

ប្រែសម្រួល៖ Vann Vann

ប្រភព៖ TASS, RT

ចុចអាន៖ រុស្ស៊ី គំរាមវាយប្រហារ រោងចក្រផលិតរថក្រោះអាល្លឺម៉ង់ នៅអ៊ុយក្រែន