លោក ពូទីន បញ្ជាឲ្យបង្កើនផលិតយន្តហោះគ្មានមនុស្សបើកវាយប្រហារ ដែលកំពុងប្រើនៅ អ៊ុយក្រែន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបញ្ជាឲ្យក្រុមហ៊ុនដែលស្ថិតនៅក្រោមការគ្រប់គ្រងរបស់រដ្ឋ បង្កើនការផលិតយន្តហោះគ្មានមនុស្សបើក ដែលកងកម្លាំងរបស់ទីក្រុងមូស្គូកំពុងប្រើប្រាស់ក្នុងប្រតិបត្តិការសឹកនៅអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន ដែលបានជួបជាមួយនាយកប្រតិបត្តិក្រុមហ៊ុនផលិត Rostec គឺលោក Sergei Chemezov បាននិយាយកាលពីថ្ងៃចន្ទថា “យន្តហោះគ្មានមនុស្សបើក ដូចជា ប្រភេទ Cube និង Lancet បានបង្ហាញឲ្យឃើញពីប្រសិទ្ធភាពដ៏ខ្លាំងក្លានៅលើសមរភូមិប្រយុទ្ធនៅអ៊ុយក្រែន” ។

លោកប្រធានាធិបតីរូបនេះបានអះអាងទៀតថា “ផលប៉ះពាល់ ក៏ដូចជាសមត្ថភាពវាយប្រហាររបស់យន្តហោះគ្មានមនុស្សបើកទាំងនេះ គឺអស្ចារ្យខ្លាំងមែនទែន ហើយវាក៏ធ្វើឲ្យសព្វាវុធ និងគ្រាប់រំសេវដែលផលិតដោយបរទេសផ្ទុះឆេះខ្លោចគ្មានសល់ផងដែរ” ។

ពាក់ព័ន្ធនឹងបញ្ហានេះដែរ ក្រសួងកិច្ចការផ្ទៃក្នុងរបស់អ៊ុយក្រែនបាននិយាយកាលពីថ្ងៃចន្ទថា ប្រទេសរុស្ស៊ីបានធ្វើការវាយប្រហារដោយមីស៊ីលចំនួន ២ លើកមកលើទីក្រុង Pokrovsk នៅភាគខាងកើតនៃតំបន់ Donetsk ដោយបណ្ដាលឲ្យមនុស្ស ៧ នាក់បាត់បង់ជីវិត របួសជាង ៨០ នាក់ និងបានបំផ្លាញអគារប្រហែល ២០ ខ្នង រួមទាំងប្លុកលំនៅដ្ឋានកម្ពស់ ៥ ជាន់ផងដែរ ។

គួរបញ្ជាក់ថា ការ​លើក​ឡើង​របស់​លោក វ្ល៉ាឌីមៀរ ពូទីន បានកើតមាន​ឡើង ​ខណៈ​ប្រទេស​លោក​ខាង​លិច​បាន​និង​កំពុង​ផ្គត់ផ្គង់​រថក្រោះ និង​ជំនួយ​យោធា​ផ្សេង​ទៀតក្នុងទំហំទឹកប្រាក់យ៉ាងច្រើនសន្ធឹកសន្ធាប់​ដល់​អ៊ុយក្រែន ចាប់តាំងពីសង្គ្រាមផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ មក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹង ទំហំទឹកប្រាក់ដែល រុស្ស៊ី ចំណាយលើវិស័យការពារជាតិ ស្របពេល កំពុងជាប់ដៃធ្វើសង្គ្រាមនៅ អ៊ុយក្រែន