ខេត្ត ហ៊ូណាន ជម្លៀសមនុស្សរាប់ពាន់នាក់ ខណៈភ្លៀងធ្លាក់ខ្លាំង និងទឹកជំនន់វាយប្រហារប្រទេស ចិន

អ្នកព្យាករអាកាសធាតុរបស់ប្រទេសចិននៅថ្ងៃចន្ទទី២៨ខែសីហា បានព្រមានខេត្តមួយចំនួនឲ្យត្រៀមខ្លួនទប់ទល់នឹងភ្លៀងធ្លាក់ខ្លាំង ក៏ដូចជាជំនន់ទឹកភ្លៀង ក្នុងរយៈពេលពីរថ្ងៃខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រព័ន្ធផ្សព្វផ្សាយរដ្ឋបានឲ្យដឹងថា មនុស្សជាងបីពាន់នាក់ ត្រូវបានជម្លៀសរួចទៅហើយនៅក្នុងខេត្តហ៊ូណានភាគពាយ័ព្យ កាលពីចុងសប្តាហ៍ ដោយសារតែភ្លៀងធ្លាក់ខ្លាំងនៅក្នុងស្រុក Sangzhi, Shimen និង Yongshun និងនៅទីក្រុង Zhangjiajie។

យោងតាមទូរទស្សន៍រដ្ឋ, ស្រុក Sangzhi បានជួបប្រទះភ្លៀងធ្លាក់ខ្លាំងបំផុតក្នុងឆ្នាំនេះ ជាមួយនឹងកម្រិតអតិបរមា២៥៦មិល្លីម៉ែត្រ ចាប់ពីយប់ថ្ងៃសៅរ៍ដល់ថ្ងៃអាទិត្យ។ វាជាភ្លៀងធ្លាក់ខ្លាំងនិងធ្ងន់ធ្ងរបំផុតនៅ Sangzhi ចាប់តាំងពីឆ្នាំ១៩៩៨មក។

ប្រទេស​ចិន ​បាន​រង​គ្រោះ​ដោយ​ភ្លៀង​ធ្លាក់ និង​ទឹក​ជំនន់អស់រយៈពេល​ជា​ច្រើន​សប្តាហ៍មកហើយ។ នៅចុងខែកក្កដា ឥទ្ធិពលព្យុះទីហ្វុង Doksuri បានបង្កឲ្យមានភ្លៀងធ្លាក់ខ្លាំងបំផុតក្នុងប្រទេសចិននារយៈពេលជាងមួយទសវត្សរ៍មកនេះ ខណៈទីក្រុងប៉េកាំង ត្រូវរងការវាយប្រហារដោយភ្លៀងធ្លាក់ខ្លាំងបំផុត មិនធ្លាប់មានសោះក្នុងរយៈពេល១៤០ឆ្នាំ។

ពេលនេះ រដ្ឋាភិបាលរបស់ប្រទេសចិន បានអំពាវនាវឲ្យបង្កើនការប្រុងប្រយ័ត្នចំពោះទឹកជំនន់ ខណៈព្យុះទីហ្វុង Saola បច្ចុប្បន្ន កំពុងធ្វើដំណើរឆ្លងកាត់សមុទ្រចិនខាងត្បូង ជាមួយនឹងការព្យាករថា វានឹងវាយប្រហារខេត្ត Guangdong នៅព្រឹកថ្ងៃសុក្រ៕

ប្រែសម្រួល៖ Vann Vann

ប្រភព៖ CNA

ចុចអាន៖ ទឹក​ជំនន់​នៅ​​ចិន ប៉ះពាល់ធ្ងន់ដល់ដំណាំ​ស្រូវ និងពោត ជាហេតុបង្កក្តីបារម្ភ អំពីអតិផរណាអាហារពិភពលោក