កូរ៉េខាងត្បូង គ្រោងដាក់ចេញច្បាប់ហាមទទួលទានសាច់ឆ្កែ

សមាជិកសភាកូរ៉េខាងត្បូងលោកស្រី Park Dae-chul គ្រោងនឹងដាក់ចេញនូវច្បាប់មួយដែលមានបំណងហាមឃាត់ការលក់ និងទទួលទានសាច់ឆ្កែ ដែលជាទំនៀមទម្លាប់ដ៏ចម្រូងចម្រាសជាច្រើនសតវត្សន៍មកហើយ ។

យោងតាមសេចក្តីរាយការណ៍របស់ប្រព័ន្ធផ្សព្វផ្សាយបានឲ្យដឹងថា ច្បាប់នេះត្រូវបានស្នើឡើងដោយគណបក្សប្រជាធិបតេយ្យដែលជាបក្សប្រឆាំងដ៏សំខាន់ ហើយភ្លាមៗនោះទទួលបានការគាំទ្រពីគណបក្សអំណាចប្រជាជនដែលកំពុងកាន់អំណាចសម្រាប់ការអនុម័តច្បាប់នេះ ។

ប្រធានគណៈកម្មាធិការគោលនយោបាយរបស់គណបក្សកាន់អំណាច លោកស្រី Park Dae-chul បាននិយាយថា “គ្រួសារកូរ៉េខាងត្បូងប្រហែល ១០ លាននាក់ចិញ្ចឹមសត្វចិញ្ចឹម ហើយពេលនេះជាពេលដែលត្រូវបញ្ចប់ការបរិភោគសាច់ឆ្កែហើយ ជាពិសេសសកម្មភាពសាច់ឆ្កែខុសច្បាប់គួរតែត្រូវបញ្ចប់” ។

ការទទួលទានសាច់ឆ្កែជាទំនៀមទម្លាប់ដែលមានអាយុកាលរាប់សតវត្សមកហើយនៅលើឧបទ្វីបកូរ៉េ ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ សាធារណជនបានងាកចេញពីការបរិភោគសាច់សត្វ ចំពេលមានការយល់ដឹងជាសាធារណៈអំពីសិទ្ធិសត្វ និងការព្រួយបារម្ភចំពោះមុខមាត់ជាអន្តរជាតិរបស់ប្រទេសកូរ៉េខាងត្បូង ។

គួរបញ្ជាក់ថា ក្នុងរយៈពេលប៉ុន្មានឆ្នាំថ្មីៗនេះ ចំនួនកសិដ្ឋាននៅទូទាំងប្រទេសកូរ៉េខាងត្បូងបានធ្លាក់ចុះពាក់កណ្តាល ប៉ុន្តែនៅតែមានសត្វឆ្កែប្រហែល ៧០ ម៉ឺនទៅ ១ លានក្បាលត្រូវបានសម្លាប់ជារៀងរាល់ឆ្នាំ ខណៈកាលពីមួយទស្សវត្សរ៍មុន មានការសម្លាប់សត្វឆ្កែរាប់លានក្បាលឯណោះ ៕

ប្រែសម្រួលដោយ ៖ ជីវ័ន្ត

ប្រភព ៖ RT