ផ្ទុះបាតុកម្មទូទាំងពិភពលោក ទាមទារឲ្យអ៊ីស្រាអែល​ បញ្ឈប់ការទម្លាក់គ្រាប់បែកលើតំបន់ ហ្គាហ្សា

បាតុកម្ម បានកើតឡើងនៅទូទាំងពិភពលោក ទាមទារឲ្យអ៊ីស្រាអែល បញ្ឈប់ការវាយប្រហាររបស់ខ្លួនលើតំបន់ហ្គាហ្សា ដែលបានសម្លាប់ជនជាតិប៉ាឡេស្ទីនជាង ៤,៣៨០ នាក់ ។

នៅទីក្រុងឡុងដ៍ ប៉ូលិសប៉ាន់ប្រមាណថា បាតុកររហូតដល់ ១០ ម៉ឺននាក់ បានដើរដង្ហែតាមដងផ្លូវ ដោយគ្រវីទង់ប៉ាឡេស្ទីន និងស្រែកថា “បញ្ឈប់ការទម្លាក់គ្រាប់បែកលើតំបន់ហ្គាហ្សាទៅ”។

បាតុករគាំទ្រប៉ាឡេស្ទីនរាប់រយនាក់ ក៏បានប្រមូលផ្តុំគ្នាផងដែរនៅទីក្រុង Belfast និង Londonderry របស់ប្រទេសអៀរឡង់ខាងជើង ខណៈរាប់ពាន់នាក់បានដើរកាត់ទីក្រុង Dublin ដោយអំពាវនាវឲ្យអ៊ីស្រាអែល បញ្ចប់ការទម្លាក់គ្រាប់បែក។

ចំណែកនៅប្រទេសបារាំង បាតុករគាំទ្រប៉ាឡេស្ទីន បានប្រមូលផ្តុំគ្នាក្នុងទីក្រុងជាច្រើន រួមមាន Rennes, Montpellier, Dijon, Marseille និង Lyon។ នៅទីនោះ មនុស្សរាប់ពាន់នាក់នាំគ្នាស្រែកថា “យើងទាំងអស់គ្នាជាជនជាតិប៉ាឡេស្ទីន”។

ដោយឡែក នៅ​អាល្លឺម៉ង់ ប៉ូលិស​​និយាយ​ថា មនុស្ស​ជិត ៧,០០០ នាក់ ​បាន​ចូលរួម​ក្នុង​បាតុកម្ម​ដោយ​សន្តិវិធី​ដែល​គាំទ្រ​ប៉ាឡេស្ទីន ​នៅ​ទីក្រុង Dusseldorf។

លើសពីនេះ មនុស្សរាប់រយនាក់ចូលរួមបាតុកម្មនៅទីក្រុង Rome, Barcelona, Toronto, New York, Los Angeles និង Washington។

នៅអាស៊ីអាគ្នេយ៍ ក៏មានបាតុកម្មផងដែរ ដោយក្នុងប្រទេសថៃ ជនមូស្លីមនិងប៉ាឡេស្ទីនប្រហែល៣០០នាក់ បានប្រមូលផ្តុំគ្នាមានទាំងដុតទង់ជាតិអ៊ីស្រាអែល ទៀតផង នៅខាងក្រៅស្ថានទូតអ៊ីស្រាអែល ក្នុងទីក្រុងបាងកក៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ជនមូស្លីមថៃនិងប៉ាឡេស្ទីនរាប់រយនាក់ ធ្វើបាតុកម្ម ក្នុងទីក្រុងបាងកក ប្រឆាំងអ៊ីស្រាអែល និងថ្កោលទោសអាមេរិក