ប្រមុខការពារជាតិអាស៊ាន អំពាវនាវឲ្យបញ្ចប់សង្គ្រាមអ៊ីស្រាអែល-ហាម៉ាស តែរកវិធីដោះស្រាយបញ្ហាមីយ៉ាន់ម៉ា មិនបាន

កាលពីថ្ងៃពុធទី១៥ខែវិច្ឆិកា រដ្ឋមន្ត្រីការពារជាតិអាស៊ីអាគ្នេយ៍ បានអំពាវនាវឲ្យបញ្ចប់សង្គ្រាមអ៊ីស្រាអែល-ហាម៉ាស និងជំរុញឲ្យពិភពលោក សហការគ្នាលើការបង្កើតច្រករបៀងជំនួយមនុស្សធម៌នៅតំបន់ហ្គាហ្សា ប៉ុន្តែថ្នាក់ដឹកនាំទាំងអស់ ក៏នៅតែមិនទាន់អាចរកវិធីដោះស្រាយជម្លោះស៊ីវិលដែលកំពុងអូសបន្លាយនៅក្នុងប្រទេសមីយ៉ាន់ម៉ាបាននោះដែរ ។

រដ្ឋមន្ត្រីទាំងអស់ ក៏បានរំលឹកឡើងវិញផងដែរ ពីសារៈសំខាន់ចំពោះសេរីភាពនៃការធ្វើនាវាចរណ៍ និងការហោះហើរលើសកម្រិតនៅសមុទ្រចិនខាងត្បូង ក៏ដូចជាការគោរពច្បាប់អន្តរជាតិ ដើម្បីទប់ស្កាត់ការប៉ះទង្គិចគ្នានៅដែនទឹកដែលមានជម្លោះ។

សមាគមប្រជាជាតិអាស៊ីអាគ្នេយ៍ចំនួន១០រួមមានទាំងប្រទេសមីយ៉ាន់ម៉ាផងដែរ ប៉ុន្តែរដ្ឋមន្ត្រីការពារជាតិរបស់ខ្លួន ត្រូវបានរារាំងពីការចូលរួមក្នុងកិច្ចប្រជុំសប្តាហ៍នេះ ដោយសារតែរដ្ឋាភិបាលយោធា មិនព្រមអនុវត្តតាមផែនការសន្តិភាព ៥ចំណុចដែលព្រាងឡើង ដើម្បីបន្ធូរបន្ថយអំពើហិង្សា។

រដ្ឋមន្ត្រីការពារជាតិឥណ្ឌូណេស៊ី លោក Prabowo Subianto បាននិយាយក្នុងសុន្ទរកថាបើកថា “យើងមានការសោកស្ដាយចំពោះស្ថានភាពកាន់តែយ៉ាប់យ៉ឺននៅក្នុងប្រទេសមីយ៉ាន់ម៉ា។ ឥណ្ឌូណេស៊ី សូមលើកទឹកចិត្តឲ្យរដ្ឋសមាជិកអាស៊ានផ្សេងទៀត គាំទ្រមីយ៉ាន់ម៉ា ដើម្បីស្វែងរកដំណោះស្រាយសន្តិភាព និងយូរអង្វែងសម្រាប់ស្ថានភាពបច្ចុប្បន្ន”។

អាស៊ាន បាននិងកំពុងព្យាយាមអនុវត្តផែនការដែលខ្លួនបង្កើត ជាមួយឧត្តមសេនីយ៍កំពូលរបស់មីយ៉ាន់ម៉ានៅឆ្នាំ២០២១ ដែលអំពាវនាវឲ្យបញ្ចប់ជាបន្ទាន់ចំពោះអំពើហិង្សា ហើយចាប់ផ្តើមកិច្ចចរចាដែលសម្របសម្រួលដោយបេសកជនពិសេសក្នុងចំណោមភាគីជម្លោះ និងផ្តល់ជំនួយដល់ជនភៀសខ្លួន។

ទោះបីជាយ៉ាងណាក៏ដោយ ​រដ្ឋាភិបាល​យោធា​មី​យ៉ាន់​ម៉ា ដែល​​ដណ្តើម​អំណាច​ក្នុង​ឆ្នាំ​២០២២ បានធ្វើ​តិចតួច​បំផុត ​ក្នុង​ការ​អនុវត្ត​ផែនការ​នេះ​។

លើសពីនេះ សេចក្តីថ្លែងការណ៍រួមមួយ ក៏បានអំពាវនាវឲ្យភាគីនៅក្នុងជម្លោះសមុទ្រចិនខាងត្បូង ត្រូវយល់ព្រមលើការសម្រេចកិច្ចចរចាសម្រាប់កតិកាសញ្ញាមិនឈ្លានពានផងដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ ប្រទេសមួយនៅ អាស៊ាន ជំរុញឲ្យមានបទឈប់បាញ់ជាបន្ទាន់ក្នុងជម្លោះ អ៊ីស្រាអែល-ហាម៉ាស