ចិន ប្រកាសលើកលែងទិដ្ឋាការ​ដល់ប្រទេសចំនួន ៦ នៅអាស៊ី​និងអឺរ៉ុប

ចិនផ្តល់សិទ្ធិចូលក្នុងប្រទេសដោយគ្មានទិដ្ឋាការជាឯកតោភាគីសម្រាប់រយៈពេល ១៥ ថ្ងៃដល់អ្នកដំណើរដែលកាន់លិខិតឆ្លងដែនធម្មតានៃប្រទេសបារាំង អាល្លឺម៉ង់ អ៊ីតាលី ហូឡង់ អេស្ប៉ាញ និងម៉ាឡេស៊ី។

ប្រជាពលរដ្ឋនៃប្រទេសទាំងប្រាំនៅអឺរ៉ុប និងម៉ាឡេស៊ីអាចចូលប្រទេសចិនបានដោយមិនចាំបាច់មានទិដ្ឋាការសម្រាប់អាជីវកម្ម ទេសចរណ៍ ដំណើរទស្សនកិច្ចជាលក្ខណៈគ្រួសារ និងគោលបំណងឆ្លងកាត់។

សម្រាប់គោលនយោបាយនេះ នឹងមានប្រសិទ្ធិភាពចាប់ពីថ្ងៃទី ១ ធ្នូ តទៅ រហូតដល់ថ្ងៃ  ៣០​ វិច្ឆិកា ឆ្នាំ ២០២៤។

លោកស្រី Mao Ning អ្នកនាំពាក្យក្រសួងការបរទេសបញ្ជាក់ថា វិធានការនេះគឺសំដៅសម្រួលដល់ការធ្វើដំណើរឆ្លងកាត់ព្រំដែន និងលើកកម្ពស់ការអភិវឌ្ឍន៍ប្រកបដោយគុណភាពខ្ពស់ និងកម្រិតខ្ពស់។

តាមរយៈអ្នកវិភាគមួយចំនួនយល់ថា ការផ្លាស់ប្តូរនេះទំនងជាមានបំណងទាក់ទាញការវិនិយោគចំពេលមានការកើនឡើងនៃភាពមិនច្បាស់លាស់អំពីសេដ្ឋកិច្ចរបស់ប្រទេសចិន។

កាលពីមុន ប្រទេសចិនបានអនុញ្ញាតឱ្យពលរដ្ឋប្រ៊ុយណេ ជប៉ុន និងសិង្ហបុរី ចូលដោយគ្មានទិដ្ឋាការ ប៉ុន្តែបានផ្អាកបន្ទាប់ពីការផ្ទុះឡើងនៃ COVID-19។ ប៉ុន្តែបន្ទាប់ពីនេះ ប្រជាពលរដ្ឋនៃប្រទេសប្រុយណេ​និងសិង្ហបុរី អាចបន្តចូលវិញដោយគ្មានទិដ្ឋការកាលពីខែកក្កដា ដោយលើកលែងជប៉ុនមួយប៉ុណ្ណោះ៕​

ប្រែសម្រួល៖ នាង រតនៈ

ប្រភព៖ China Daily