លោក ហ្សេលេនស្គី បង្ហាញពី ជ័យជម្នះចំនួន៣ ដែលអ៊ុយក្រែន ត្រូវឈ្នះឲ្យបាន

ក្នុងអំឡុងសន្និសីទសារព័ត៌មានមួយកាលពីចុងសប្តាហ៍ ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី បានសារភាពថា ប្រទេសអ៊ុយក្រែន ចាំបាច់ត្រូវសម្រេចឲ្យបាននូវជ័យជម្នះសំខាន់ៗចំនួនបី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី បានចោទប្រកាន់រុស្ស៊ីពីការកេងចំណេញលើបញ្ហាដែលពិភពលោកកំពុងប្រឈមមុខ ដើម្បីបង្វែរការយកចិត្តទុកដាក់ពីអន្តរជាតិ។

លោកហ្សេលេនស្គីនិយាយថា “យើង​ត្រូវ​ការ​ជ័យ​ជម្នះ​ចំនួនបី។ ទីមួយគឺឈ្នះលើសភា វាគឺជាបញ្ហាប្រឈមមួយ វាមិនងាយស្រួលឡើយ”។

ជោគជ័យទីពីរដែលត្រូវតែសម្រេចឲ្យបានគឺ ទទួលបានជំនួយទឹកប្រាក់៥០ពាន់លានអឺរ៉ូ (៥៥ពាន់លានដុល្លារ) ពីសហភាពអឺរ៉ុប (EU) ដែលមិនទាន់អនុម័ត។ លោកប្រធានាធិបតីនិយាយថា “មិនមែនគ្រប់គ្នានៅក្នុង EU សុទ្ធតែត្រៀមខ្លួនដើម្បីគាំទ្រកញ្ចប់នេះ នៅថ្ងៃនេះទេ។ ភារកិច្ចរបស់យើងគឺធ្វើឲ្យប្រាកដថា អ្នកគ្រប់គ្នាត្រូវគាំទ្រកញ្ចប់នេះ”។

លោក ហ្សេលេនស្គី និយាយថា ជោគជ័យទីបី ដែលអ៊ុយក្រែនស្វែងរក គឺសេចក្តីសម្រេចរបស់ទីក្រុងព្រុចសែល ដើម្បីចាប់ផ្តើមការចរចាស្តីពីសមាជិកភាព EU របស់អ៊ុយក្រែន។

កាលពីដើមខែនេះ រដ្ឋបាលរបស់ប្រធានាធិបតីអាមេរិក លោក ចូ បៃដិន បានបរាជ័យក្នុងការជំរុញកញ្ចប់ចំណាយ១៩៥ពាន់លានដុល្លារ តាមរយៈសភា ខណៈក្នុងនោះប្រាក់ភាគច្រើនមានបំណងផ្តល់ឲ្យទីក្រុងកៀវ។ ជំនួសមកវិញ លោកប្រធានាធិបតី ត្រូវចុះហត្ថលេខាលើផែនការផ្តល់មូលនិធិ ដែលមិនរាប់បញ្ចូលជំនួយអ៊ុយក្រែន ដើម្បីបញ្ចៀសការបិទរដ្ឋាភិបាល។

ក្នុងពេលជាមួយគ្នានោះ កញ្ចប់ប្រាក់កម្ចីនិងជំនួយ៥០ពាន់លានអឺរ៉ូរបស់ EU ត្រូវបានរារាំង ដោយសារតែការជំទាស់ពីប្រទេសជាសមាជិករួមទាំងហុងគ្រីផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ ស្ងាត់ៗ រុស្ស៊ី បើកការវាយលុកលើកទី ៣ ទៅលើតំបន់ភាគខាងកើត អ៊ុយក្រែន