ស្ងាត់ៗ រុស្ស៊ី បើកការវាយលុកលើកទី ៣ ទៅលើតំបន់ភាគខាងកើត អ៊ុយក្រែន

កងកម្លាំងរុស្ស៊ីកំពុងបើកការវាយលុកលើកទី ៣ ទៅលើទីក្រុង Avdiivka ដែលជាទីក្រុងយុទ្ធសាស្ត្រដ៏សំខាន់មួយនៅក្នុងតំបន់ភាគខាងកើតនៃសាធារណរដ្ឋ Donetsk ប៉ុន្តែទោះជាយ៉ាងណា យោធាអ៊ុយក្រែនក៏បានបញ្ចប់សកម្មភាពវាយលុកនោះផងដែរ ។

មេបញ្ជាការយោធាអ៊ុយក្រែន លោក Oleksander Tarnavskyi បាននិយាយនៅលើការបង្ហោះតាមប្រព័ន្ធផ្សព្វផ្សាយសង្គមថា ក្នុងការវាយប្រហារនោះ កងកម្លាំងរុស្ស៊ីបានព្យាយាមឡោមព័ទ្ធទីក្រុង Avdiivka ប៉ុន្តែត្រូវបានកងទ័ពអ៊ុយក្រែនបញ្ចេញសកម្មភាពទប់ស្កាត់ទាន់ពេលវេលា ហើយក៏មានការបង្គិចគ្នាមួយប្រាវផងដែរ ។

កងកម្លាំងរុស្ស៊ីបានដាក់ពង្រាយទាហាន និងរថពាសដែកជាច្រើនគ្រឿង ដើម្បីវាយលុកទីក្រុង Avdiivka ចាប់តាំងពីខែមុនមកម្ល៉េះ ក្នុងគោលបំណងព្យាយាមគ្រប់គ្រងតំបន់ Donetsk ទាំងមូល ខណៈការ​ប្រយុទ្ធ​គ្នាក្នុងរលកទី ៣ នេះត្រូវបានគេមើលឃើញថានឹងកាន់តែបែកផ្កាភ្លើងខ្លាំងជាងមុនទៅទៀត ។

ទន្ទឹមនោះ ការវាយលុករបស់កងកម្លាំងរុស្ស៊ីនៅពេលថ្មីៗនេះក៏កើតមានឡើង ស្របពេលដែលកងកម្លាំង​អ៊ុយក្រែន​​កាល​ពី​ថ្ងៃ​ទី ១០ ខែ​វិច្ឆិកា បានបើក​ប្រតិបត្តិការ​យោធា​ក្នុងតំបន់​គ្រីមៀដែលរដ្ឋាភិបាលទីក្រុងមូស្គូបាន​បញ្ចូល​ជា​ឯកតោភាគី​ក្នុង​ឆ្នាំ ២០១៤ នៅភាគ​ខាង​ត្បូង​ប្រទេស​អ៊ុយក្រែន ។

គួរបញ្ជាក់ថា រហូតមកដល់ពេលនេះ សង្គ្រាមរវាងរុស្ស៊ី និងអ៊ុយក្រែនដែលផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ នៅតែបន្តអូសបន្លាយពេល និងមិនមានសញ្ញាថមថយណាមួយឡើយ ខណៈសហរដ្ឋអាមេរិក និងសម្ព័ន្ធមិត្តក៏បានផ្ដល់កញ្ចប់ជំនួយយោធាទៅឲ្យរដ្ឋាភិបាលទីក្រុងកៀវក្នុងទំហំទឹកប្រាក់រាប់រយពាន់លានដុល្លារផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK