ឆ្នាំក្រោយ ថៃ រៀបចំពិធីបុណ្យសង្ក្រាន្ត មួយខែពេញ

ឆ្នាំ២០២៤ គណៈកម្មាធិការរដ្ឋាភិបាលថៃ នឹងប្រារព្ធពិធីបុណ្យ សង្ក្រាន្ត ពេញមួយខែមេសាតែម្តង ពោលគឺមិនរៀបចំត្រឹម៣ថ្ងៃដូចប្រពៃណីឡើយ ក្នុងគោលបំណង ធ្វើឲ្យប្រទេស ស្ថិតក្នុងចំណោមគោលដៅទេសចរណ៍ពិភពលោកកំពូលទាំង១០ សម្រាប់ពិធីបុណ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំគណបក្សភឿថៃលោកស្រី Paetongtarn Shinawatra ដែលជាប្រធានគណៈកម្មាធិការយុទ្ធសាស្ត្រថាមពលទន់ជាតិ បានប្រកាសផែនការនេះនៅថ្ងៃទី១ខែធ្នូ នៅលើទំព័រ Facebook របស់ខ្លួន។

លោកស្រីនិយាយថា ផែនការថាមពលទន់សម្រាប់ឆ្នាំ២០២៤ បានចាប់ផ្តើមហើយ ដោយមានអនុគណៈកម្មការចំនួន១២នៅទូទាំងឧស្សាហកម្មទាំង១១ បានស្នើសុំថវិកាដើម្បីជំរុញសេដ្ឋកិច្ចច្នៃប្រតិដ្ឋ។

លោកស្រីបន្តថា “ប្រធានបទដ៏គួរឲ្យរំភើបមួយទៀតដែលត្រូវបានពិភាក្សា គឺផែនការសម្រាប់ពិធីបុណ្យ សង្ក្រាន្ត នៅឆ្នាំក្រោយ។ ​សង្ក្រាន្ត​លើក​ក្រោយ​នឹង​មិន​ដូច​ឆ្នាំ​មុនៗ​ឡើយ ព្រោះ​យើង​កំពុង​រៀបចំ​ព្រឹត្តិការណ៍​ដ៏​ធំ “​បុណ្យលេងទឹក​ពិភពលោក និងបាតុភូត​សង្ក្រាន្ត​”។

សង្ក្រាន្តឆ្នាំ២០២៤ នឹងក្លាយជាព្រឹត្តិការណ៍លំដាប់ពិភពលោក ដែលប្រារព្ធមិនមែនត្រឹមតែរយៈពេលបីថ្ងៃប៉ុណ្ណោះទេ ប៉ុន្តែគឺពេញមួយខែមេសាតែម្តង នៅក្នុងខេត្តទាំង៧៧ ទូទាំងប្រទេស។

ទោះបីជាយ៉ាងណាក៏ដោយ ពិធីបុណ្យធំគឺនៅតែធ្វើឡើងក្នុងអំឡុងពេល៣ថ្ងៃដដែល ខណៈថ្ងៃនៅសល់ក្នុងរយៈពេលមួយខែនេះ នឹងមានការរៀបចំពិធីវប្បធម៌ផ្សេងៗ។

សូមបញ្ជាក់ថា កាលពីថ្ងៃទី៣០ខែវិច្ឆិកា គណៈកម្មាធិការបានជួបប្រជុំ និងសម្រេចកញ្ចប់ថវិកាចំនួន ៥.១៦ ពាន់លានបាត ដើម្បីលើកកម្ពស់ថាមពលទន់របស់ប្រទេសថៃ ដែលនឹងបង្កើតប្រាក់ចំណូលមកវិញសម្រាប់វិស័យទេសចរណ៍ និងឧស្សាហកម្មពាក់ព័ន្ធ៕

ប្រែសម្រួល៖ Vann Vann

ប្រភព៖ Straits Times, Bangkok Post

ចុចអាន៖ ព្រឹត្តិការណ៍សង្ក្រាន្ត​ឆ្នាំនេះ ខេត្ត​បាត់ដំបង អាច​ទាញ​កំណើន​ភ្ញៀវ​ក្នុង​រយៈពេល​៣​ថ្ងៃ​បាន​ជាង​១​លាន​នាក់