ប៉ូឡូញព្រមានថា ណាតូ សល់ពេល៣ឆ្នាំទៀតប៉ុណ្ណោះ ដើម្បីត្រៀមខ្លួនសម្រាប់ការវាយប្រហាររបស់រុស្ស៊ី

ប្រធានសន្តិសុខជាតិប៉ូឡូញ បានព្រមានថា អង្គការណាតូ សល់ពេលត្រឹម ៣ ឆ្នាំប៉ុណ្ណោះដើម្បីត្រៀមខ្លួនសម្រាប់ការវាយប្រហាររបស់រុស្ស៊ី ចំពេលមានក្តីបារម្ភកាន់តែខ្លាំងឡើងអំពីសង្គ្រាមនៅអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលុកលុយរបស់លោក វ្ល៉ាឌីមៀរ ពូទីន បានអូសបន្លាយចូលដល់ខែទី ២១ ខណៈបរាជ័យជាបន្តបន្ទាប់របស់ទីក្រុងកៀវ ធ្វើឲ្យគេមើលឃើញថា សង្រ្គាមនេះត្រូវជាប់គាំង។

ស្របពេលជាមួយគ្នានោះ សហរដ្ឋអាមេរិក និងសហភាពអឺរ៉ុប កំពុងតស៊ូដើម្បីផ្តល់កញ្ចប់ជំនួយយោធាបន្ថែមទៀតឲ្យអ៊ុយក្រែន ដែលកត្តាគាំទ្រទាំងនេះហើយ បណ្តាលឲ្យមានការផ្តោតអារម្មណ៍ថា វិមានក្រឹមឡាំង ច្បាស់ជាគំរាមដល់អង្គការណាតូ និងប្រទេសអឺរ៉ុបខាងជើង ដែលមានព្រំដែនជាប់រុស្ស៊ី និងសម្ព័ន្ធមិត្តរបស់ខ្លួនគឺបេឡារុស ជាក់ជាមិនខាន។

ដើមឡើយនៅក្នុងរបាយការណ៍ដ៏គួរឲ្យព្រួយបារម្ភមួយ ពីសំណាក់ក្រុមអ្នកជំនាញអាល្លឺម៉ង់បានអះអាងថា សម្ព័ន្ធភាពណាតូ ត្រូវតែត្រៀមខ្លួនឲ្យរួចរាល់ ដើម្បីទប់ទល់នឹងការវាយប្រហាររបស់រុស្ស៊ីក្នុងរយៈពេលពី ៦ ទៅ ១០ ឆ្នាំទៀត ។

ប៉ុន្តែ​បើ​តាម​លោក Jacek Siewiera ប្រធាន​ការិយាល័យ​សន្តិសុខ​ជាតិ​របស់​ប៉ូឡូញ បានសង្កត់ធ្ងន់ថា របាយការណ៍​នេះ ហាក់ដូចជា​មើល​ស្រាល​ដល់​ពេល​វេលាពេកហើយ ។

លោកបានប្រាប់កាសែតប៉ូឡូញ Nasz Dziennik នៅក្នុងបទសម្ភាសមួយដែលចេញផ្សាយលើគេហទំព័រប្រធានាធិបតីប៉ូឡូញថា “តាមគំនិតខ្ញុំ ពេលវេលាដែលបង្ហាញដោយអ្នកវិភាគអាល្លឺម៉ង់ គឺមានសុទិដ្ឋិនិយមខ្លាំងពេក ។ ប្រសិនបើ​យើង​ចង់​ចៀស​វាង​សង្គ្រាម, ប្រទេស​ណាតូ​នៅ​ប៉ែក​ខាង​កើត​ គួរតែ​ប្រកាន់​យក​រយៈ​ពេល​ខ្លី​ជាង ៣ ឆ្នាំ ដើម្បី​ត្រៀម​ខ្លួន​សម្រាប់​ការ​ប្រឈម​មុខ​ដាក់​គ្នា។ នេះគឺជាពេលវេលាសក្តានុពលមួយ ដែលត្រូវតែបង្កើតឡើងនៅចំហៀងខាងកើត ហើយនឹងក្លាយជាសញ្ញាច្បាស់លាស់ក្នុងការទប់ស្កាត់ការលុកលុយណាមួយ”។

ចាប់តាំងពីលោក ពូទីន ផ្តើមការលុកលុយទ្រង់ទ្រាយធំរបស់គាត់លើអ៊ុយក្រែនក្នុងខែកុម្ភៈ ឆ្នាំ ២០២២មក មន្ត្រីជាន់ខ្ពស់វិមានក្រឹមឡាំងបានព្រលយពាក្យថា វាគ្រាន់តែជាការចាប់ផ្តើមនៃមហិច្ឆិតាអធិរាជប៉ុណ្ណោះ! លោកពូទីន កំពុងសម្លឹងមើលលើរដ្ឋសមាជិកណាតូ នៅភាគខាងកើតជាច្រើនទៀត។

ហេតុនេះហើយ ទើបធ្វើឲ្យមជ្ឈដ្ឋានមួយចំនួនបង្ហាញក្តីបារម្ភ ហើយប៉ូឡូញផ្ទាល់ក៏បានចេញការព្រមានពីពេលវេលាផងដែរ ដោយប្រាប់ឲ្យសមាជិកណាតូ កុំអូសបន្លាយពេលយូរពេក ត្រូវត្រៀមខ្លួនឲ្យបានឆាប់តាមដែលអាចធ្វើទៅបាន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អភិបាលក្រុងកៀវ ថា មើលទៅ លោក Zelensky បែបកាន់តំណែងមិនបានយូរទៀតទេ