រុស្ស៊ី និងអ៊ីរ៉ង់ ពួតដៃគ្នាប្រឆាំងនឹងទណ្ឌកម្មរបស់ អាមេរិក

ប្រទេសរុស្ស៊ី និងអ៊ីរ៉ង់កាលពីអង្គារបានចុះហត្ថលេខាលើកិច្ចព្រមព្រៀងមួយដើម្បីប្រឆាំងនឹងទណ្ឌកម្មឯកតោភាគីដែលដាក់ដោយរដ្ឋាភិបាលសហរដ្ឋអាមេរិក និងប្រទេសលោកខាងលិច ខណៈបន្ទាប់ពីពិធីចុះហត្ថលេខានោះហើយ រដ្ឋមន្ត្រីការបរទេសប្រទេសទាំងពីរក៏បានពិភាក្សាគ្នាអំពីការពង្រីកទំនាក់ទំនងទ្វេភាគីផងដែរ ។

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយ មុនកិច្ចប្រជុំជាមួយសមភាគីអ៊ីរ៉ង់ លោក Hossein Amir-Abdollahian នៅទីក្រុងមូស្គូថា “ប្រទេសទាំងពីរបានចុះហត្ថលេខាលើសេចក្តីប្រកាសរួមមួយស្តីពីមធ្យោបាយ និងយុទ្ធសាស្ត្រទប់ទល់ កាត់បន្ថយ ក៏ដូចជាការទូទាត់សងសម្រាប់ផលវិបាកអវិជ្ជមាននៃវិធានការបង្ខិតបង្ខំជាលក្ខណៈឯកតោភាគីរបស់អាមេរិក” ។

លោក Lavrov បាននិយាយទៀតថា “កិច្ចព្រមព្រៀងនេះគឺជាជំហានដ៏សំខាន់មួយនៅក្នុងការបង្កើនការសម្របសម្រួលនៃកិច្ចខិតខំប្រឹងប្រែងដោយសមាជិកនៃសហគមន៍ពិភពលោក ដើម្បីយកឈ្នះលើទណ្ឌកម្មខុសច្បាប់ដែលសហរដ្ឋអាមេរិក និង​សម្ព័ន្ធមិត្ត​របស់​ខ្លួន​ប្រើវា​ជា​ការ​ជំនួស​ផ្នែក​ការទូត” ។

ក្នុងអំឡុងពេលកិច្ចពិភាក្សានោះដែរ ទាំងអ៊ីរ៉ង់ និងរុស្ស៊ី ដែលប្រទេសទាំងពីរសុទ្ធសឹងតែត្រូវបានដាក់ទណ្ឌកម្មដោយសហរដ្ឋអាមេរិក ក៏បានពង្រឹង និងពង្រីកទំនាក់ទំនងផ្នែកនយោបាយ និងសេដ្ឋកិច្ចទ្វេភាគី ដើម្បីទប់ទល់នឹងទង្វើមិនគម្បីណាមួយបន្ថែមទៀតរបស់សហរដ្ឋអាមេរិក ។

គួរបញ្ជាក់ថា កិច្ចប្រជុំរបស់លោក Lavrov និងលោក Amir-Abdollahian ធ្វើឡើង បន្ទាប់ពីអ្នកការទូតទាំងពីរបានចូលរួមក្នុងកិច្ចពិភាក្សាជាមួយរដ្ឋកាសព្យែនទាំង ៥ ដែលក៏ត្រូវបានចូលរួមផងដែរដោយសមភាគីអាស៊ែបៃហ្សង់ កាហ្សាក់ស្ថាន និងតួកម៉េនីស្ថាន ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ តើសង្គ្រាម រុស្ស៊ី-អ៊ុយក្រែន នឹងបិទបញ្ចប់ដោយរបៀបណា?